Siglir tar il cuntegn
cuntegn

Parc Adula Tranter tristezza e legria – reacziuns davart Parc Adula

Ils ins deploreschan il «na» al Parc Adula, ils auters èn cuntents e vulan uss sa concentrar sin auters projects.

Purtret d'ina tavla cun scrit si «Goodbye Adula».
Legenda: Uschia guardi ora tar ils adversaris dal Parc Adula a Rabius. RTR, Gion Gieri Flepp
Jau deploresch il foss tranter nord e sid.
Autur: Martin Jägercusseglier guvernativ

La regenza grischuna n'è mai s'exprimida per u cunter il Parc Adula. Quai n'è er betg usità sch'i è ina decisiun da la vischnanca. Dentant aveva il chantun sustenì finanzialmain il svilup dal Parc Adula ed era da projects sco per exempel il Parc Ela.

Martin Jäger è da l'opiniun che las mentalitads en las regiuns grischunas èn differentas. En il sid hajan ins plitost vì las schanzas, en las vischnancas che hajan ditg na, hajan ins plitost vì ils privels.

Nus stuain acceptar la decisiun.
Autur: Fabrizio Kellerpresident da l’uniun Parc Adula

Il president da l'uniun Parc Adula, Fabrizio Keller pren enconuschientscha da la decisiun e di ch'i na dettia nagut auter che acceptar la decisiun democratica. L'uniun Parc Adula duai vegnir schliada si.

Fatg surstar el hajan ils resultats negativs da Medel e da Serravalle. Era Martin Hilfiker, il directur dal Parc Adula è il pli surstà da questas duas vischnancas. Ma er tar Blenio sajan las speranzas per in gea stadas qua enfin la fin. La discrepanza tranter il nord ed il sid sa declera Keller uschia, ch'il sid haja probabel in pli grond basegn per projects per carmalar turists en las regiuns che las regiuns dal nord.

La presidenta da la vischnauca da Blegn Claudia Boschetti-Straub aveva gia prendì cler posiziun encunter il Parc Adula e quai ha ella fatg puplicamain. Che sia vischnanca voteschia talmein cler encunter il parc cun 713 na encunter 453 giea, è dentant er per ella ina surpraisa.

Igl è vegnì lavurà cun las temas da la populaziun.
Autur: Sep Cathomasaderent dal Parc Adula

Il resultat saja surprendent per Sep Cathomas. El deplorscha il pli fitg ch'i na saja betg grategià da far cler a la populaziun l'impurtanza dal project per la regiun e per il futur. El na sappia betg prop sa declerar il resultat. Dentant crai el ch'in factur saja segir stà ch'i saja vegnì lavurà cun las temas da la glieud, ma quai saja in problem general en la politica. Cathomas è dentant da l'opiniun ch'i hajan fatg tut il pussaivel per il parc.

La differenza tranter nord e sid sa declera el uschia che las valladas dal sid hajan probabel plitost vesì la posiziun nua ch'i stettian ed hajan vulì prender vair la schanza per in svilup. Cuntent è Sep Cathomas cun la fitg auta participaziun da la populaziun tar la votaziun. Quai mussia che l'avegnir giaschia per cor a la glieud.

Nus na vendain betg nossas muntognas per raps.
Autur: Leo Tuoradversari dal Parc Adula

Leo Tuor è da l'opiniun ch'ils daners e las emoziuns han decidì il destin dal Parc Adula. Il suveran haja realisà ch'i saja vegnì investà memia blers daners da taglia en tals project che na funcziunian betg. La glieud n'haja er betg cartì ch'i possia tras il parc dar in svilup pli grond.

Tuor crai ch'i purtass dapli d'investir dapli en la politica per famiglias per ch'i dettia dapli uffants en las regiuns. I fissi d'investir dapli en ideas e projects pli pitschens e betg en tals projects gronds - quels na funcziunian betg en Grischun.

Las regiuns ston puspè entschaiver a crair en las atgnas fermezzas.
Autur: Martin Loretzadversari dal Parc Adula

Martin Loretz crai ch'i saja vegnì sveglià blers bels maletgs en ils chaus da las persunas, ma uss stoppian ins puspè turnar en la realitad. En Val dettia plirs projects che sajan sin via e quels sajan per el pli impurtants ch'il Parc Adula. I dettia uschè blers parcs en l'Europa che quai saja be pli in product da massa, ma nagut original pli.

Las regiuns stoppian puspè entschaiver a crair en las atgnas fermezzas, uschia Loretz. El è cumplainamain satisfatgs dal resultat.

RR novitads 16:00