Siglir tar il cuntegn
cuntegn

Parc Adula Parc Adula: betg in bel di per las organisaziuns da l'ambient

Grev vegnia per las regiuns che hajan ditg na da chattar sumegliants projects cun la medema paisa, quai manegia la presidenta da la Pro Natura, Silva Semadeni. Anita Mazzetta dal WWF percunter na chapescha betg la critica cunter las organisaziuns da l'ambient.

Legenda: Guardar il video Il project Parc Adula è giud maisa. Durada 02:40 minutas.
Or da Telesguard dals 28.11.2016.

Per Anita Mazzetta dal WWF Grischun è la critica envers las organisaziuns da l’ambient betg giustifitgada. Las organisaziuns sajan instituziuns legitimadas democraticamain, e controlleschian be che las leschas valaivlas vegnan resguardadas. La colliaziun dal naufragi dal project Parc Adula cun la rolla da las organisaziuns da l’ambient na saja betg giustifitgada.

Decidì cunter ina schanza

Per la Pro Natura saja adina stà cler che las vischnancas decidan sch’il Parc Adula vegnia realisà u betg. Quai ha ditg Silva Semadeni a Radiotelevisiun Svizra Rumantscha. Tenor Semadeni han las vischnancas che han decidì davart il Parc Adula manchentà ina schanza. Alternativas na sajan betg en vista.

Tema ha influenzà la decisiun

En connex cun il Parc Adula saja adina puspè sa mussada la tema da leschas, scumonds e controllas, ha manegià la presidenta da la Pro Natura. Schizunt da polemica discurra ella, en connex cun las ovras idraulicas da Zervreila ch’avevan pretendì da stuair far giu il mir da fermada.

Alternativa per las valladas che han ditg gea

Enstagl da sa decider per la furma d’in parc naziunal datti era l’alternativa da crear insatge pli pitschen sco in parc regiunal. En il Grischun dettia dentant gia trais parcs regiunals, ha fatg attent Silva Semadeni. I fiss dentant tenor ella ina via pussaivla per las vischnancas da las valladas talianas dal Grischun che han ditg gea al project Parc Adula.

RR actualitad 07:00 / 12:00