La staziun intensiva da l’Ospital chantunal dal Grischun è s’emplenida aifer ils ultims dis, uschia ch’il cusseglier guvernativ Peter Peyer ha discurrì mardi saira d’ina situaziun critica. Set dals diesch letgs sajan occupads cun persunas ch’han Covid.
Tenor in pledader da l’ospital saja il persunal dentant gia dapi bunamain dus onns sut squitsch permanent. Actualmain vegnian ins a frida cun la situaziun. Autras operaziuns possian anc adina vegnir fatgas. Co la situaziun guarda ora en il futur, na sappian ins betg dir. In pitschen levgiament ha quai dà mesemna: In dals letgs occupads è puspè vegnì liber.
Situaziun pli precara a Turitg ed a Berna
Pli dramatica è la situaziun actualmain en l'Ospital universitar a Turitg sco er en l'Inselspital a Berna. En il chantun Turitg èn quasi tut ils letgs intensivs occupads, l'ospital universitar è occupà per 98%, ha ditg Peter Steiger, il directur substitut da l'institut per medischina intensiva.
Perfin d'in derschalet tschantscha Stefan Jakob da l'Inselspital a Berna. Er là saja la staziun intensiva quasi occupada daltut. Ed i na possia gnanc vegnir duvrà tut ils letgs da l'intensiva, perquai ch'il pesunal manchia.