En il nov format da cursa sa mesiran 300 passlunghistas e passlunghists. Las pli spertas ed ils pli sperts pon sa qualifitgar per il final da notg, che suonda al principi da k.o. Analog al Skicross sa mesiran mintgamai quatter atlets u atletas e dus avanzan en la proxima runda.
Il «Nordic City Sprint» duai mussar che passlung è in sport modern ed attractiv, di il schef d'events dal turissem da Tavau/Claustra, Andre Rellstab. Passlung saja vegnì pli e pli popular ils davos onns, ma haja per part anc adina la reputaziun d'esser in sport antiquà. Ord quai motiv hajan ins decis da far quai eveniment amez Tavau.
La loipa da radund in kilometer vegnia a cumpigliar ina muntada, parts da sprint, curvas stretgas e schizunt sigls. Era per ils uffants datti in'eveniment nua ch'els pon sa mesirar cun il temp dad in profi.