Siglir tar il cuntegn

Header

audio
Blera lavur – dentant memia paucs mastergnants!
Or da Marella dals 13.02.2022. Maletg: RTR / Esther Berther
laschar ir. Durada: 46 minutas 18 Secundas.
cuntegn

Mancanza acuta da mastergnants Scrinaris, miradurs, picturas ubain installaturas – mancan

La mancanza da mastergnants e mastergnantas fa gia oz problems a diversas branschas. La vista en l'avegnir fa quitads. La demografia fa cler: il problem vegn anc pli grond che quai ch'el è gia oz.

Il problem principal per l'avegnir per l'economia en il Grischun è il manco da persunal.
Autur: Maurus Blumenthal Directur da l'Uniun grischuna d'artisanadi e mastergn

Impressaris e mainafatschentas raquintan da lur sforzs da chattar persunal qualifitgà. «Inserats, quai na fatsch jau daditg betg pli» – quai portia nagut, di Rafael Guldimann che maina a Trun ina fatschenta d'installaziuns sanitaras e stgaudaments. Pervi da la lavur pudess el engrondir sia fatschenta, chattar persunal adattà saja dentant il problem.

video
Mancanza acuta da mastergnants en Surselva
Or da Telesguard dals 14.02.2022.
laschar ir. Durada: 4 minutas 37 Secundas.

Era Mattias Friberg, mainafatschenta da la firma da bajegiar Beer SA a Rabius enconuscha quest problem. Durant la stad occupa la firma 110 collavuraturs e collavuraturas. Guardond sin la demografia e savend co che quai sa sviluppia ils proxims onns, saja quai schon in tema che fetschia quitads.

Sche chattar persunal fiss uschè simpel sco quai ch'ins pensa magari, lura avess jau magari pli ruassaivels dis. Quai dat propi da patratgar.
Autur: Mattias Friberg impressari

Che la branscha sezza possia far ina u l'autra midada, da quai è Clau Degonda, impressari a Cumpadials persvas. «Nus pudain mirar che las plazzas restian attractivas, crear models flexibels cun lavur parziala ubain porscher in bun lieu da lavur. Dentant saja era anc da lavurar vid la reputaziun da lavurs manualas. Quella n'è betg anc là nua ch'ella avess dad esser.»

Era davart da la politica èn ins fitg pertschert che la mancanza da persunal vegnia els proxims onns a fatschentar anc bler pli fitg. Tenor il minister d'economia, Marcus Caduff possia la politica tranter auter guardar per il suandant:

  • procurar per canortas, uschia che tut quels che vulan lavurar, possian era far quai
  • lura saja la scolaziun en il lieu fitg impurtanta
  • e la finala sco terz punct saja da communitgar anc pli fitg ch'il Grischun saja in bun lieu per vegnir a lavurar ed abitar
video
Mancanza da mastergnants: Co schliar quel problem?
Or da Telesguard dals 15.02.2022.
laschar ir. Durada: 4 minutas 25 Secundas.

Il cusseglier guvernativ e minister d'economia di che tar mintga inscunter cun represchentants da l'economia saja questa problematica in tema. Simplas schliaziuns na dettia dentant betg.

Las interpresas ston daventar pli flexiblas, porscher plazzas da lavur parzialas ubain era pussibilitar dapli vacanzas. Oz è quai in giavisch en la societad.
Autur: Clau Degonda mainafatschenta

Maurus Blumenthal, il directur da l'Uniun grischuna d'artisanadi e mastergn è fitg pertschert da la problematica da persunal. Quel manchia en la gronda part da las branschas è daventia adina pli problematic. Per el duai la collavuraziun tranter politica, branschas ed impressaris daventar anc pli stretga. Ins stoppia chattar vias co recrutar lavurants e lavurantas d'ordvart. Senza quels na saja betg pussaivel da far frunt a la mancanza.

Nus avain il plaz, nus avain il material ed era la lavur per pudair engrondir, dentant manca il collavuratur. In u dus avessan patgific anc plaz.
Autur: Rafael Guldimann mainafatschenta

RTR actualitad 07:00 / Marella 09:00

Artitgels legids il pli savens