Siglir tar il cuntegn
Inhalt

L'urs en il Grischun Observà in urs en Engiadina

Questa damaun a las 9.15 ha Peter Balscheit da Tschierv pudì fotografar in urs en la vischinanza da Zernez. Sco quai ch'el ha fatg a savair envers Radiotelevisiun Svizra Rumantscha saja el stà da viadi cun ses auto da Zernez a Brail, cura ch’el haja vis l’urs tar la Val Raschitsch.

L'urs è vegnì fotografà questa damaun en la vischinanza da Zernez sin in mir sper la strada.
Legenda: L'urs è vegnì fotografà questa damaun en la vischinanza da Zernez. Peter Balscheit

Sco l'uffizi chantunal da chatscha ha confermà, sa tractia da l'urs M25, in giuven urs masculin da 2 onns. Quest urs era vegnì piglià il favrer en il Tirol dal sid ed equipà cun in emettur. El è vegnì la notg passada sur la Val Müstair en l'Engiadina.

Il «killer da nursas»

Che l’urs portia in emettur saja in nausch segn, uschia Georg Brosi da l’uffizi da chatscha grischun. Cunzunt urs che fetschian problems portian in tal. M25 vegnia titulà en il Tirol dal sid sco «killer da nursas». Sco l’urs vegnia a sa cumportar en il Grischun, na possian ins dentant anc betg dir.