Siglir tar il cuntegn
cuntegn

Interna Ils Svizzers vulan las cunvegnas bilaterals cun l’UE

Adina dapli Svizzers vulan mantegnair las cunvegnas bilateralas cun l'Uniun europeica. Envers l'adesiun a l'UE èn els però sceptics.

Fegl cun in diagram sin ina maisa
Legenda: Il barometer da quitads vegn publitgà ina giada ad onn. Keystone

Quatter da tschintg Svizras e Svizras sustegnan las cunvegnas bilateralas. Cumpareglià cun l'onn passà è la cumpart che è en favur da la via bilaterala creschida per 5% sin 81%. Quai mussa il barometer da quitads da la Credit Suisse.

Quai che pertutga in'adesiun a l'UE daventa il pievel svizzer però adina pli sceptic. La cumpart che vuless in'adesiun è entant sa reducida da 23% sin 10%.

Bunas notas per il Cussegl fedreal

Il Cussegl federal survegn per sia lavur en la politica exteriura bunas notas da la gronda part da las Svizras e dals Svizzers. 69% dad els han ditg dad esser fitg u plitost cuntents da questa politica.

Areguard la politica interna mettan las persunas intervistadas il pli grond pais sin la promoziun da l’instrucziun e sin ina AVS e assicuranza d’invaliditad garantidas a lunga vista. Sin il terz plaz è l’access a martgads esters.

Quitads principals restan

Ils quitads principals da las Svizras e dals Svizzers èn però dapli onns ils medems – numnadamain la dischoccupaziun, la prevenziun da la vegliadetgna e dumondas dals esters.

Il barometer da quitads da la Credit Suisse vegn fatg dapi 40 onns ina giada l’onn. Sin l’incumbensa da la CS ha l’institut da perscrutaziun gfs.bern fatg, il fanadur passà, in’enquista represchentativa cun 1010 persunas cun dretg da votar en tut las parts da la Svizra.