Ina abitaziun da vacanzas a San Murezzan custa actualmain 19'500 francs pro meter quadrat – quai è in plus dad 11% cumpareglià cun l'onn 2020. Sin plazza dus suonda Gstaad e sin plazza trais la regiun da la Jungfrau.
Creschids per passa 15% èn las immobiglias dentant era ad Arosa, Flem/Laax ed Engelberg. Quai mussa in studi da la banca UBS.
Corona la culpa
La raschun per la gronda dumonda suenter immobiglias è la pandemia da Covid-19: Las restricziuns da far viadis e l'obligaziun da homeoffice hajan effectuà in boom sin abitaziuns da vacanzas. E cunquai ch'il lieu da lavurar na stoppia betg esser il medem sco il lieu d'abitar, hajan bleras persunas dischloccà lur dimora en regiuns muntagnardas.
Il studi menziunescha dentant era l'iniziativa cunter abitaziuns secundaras e scriva «de facto d'in scumond da construcziun». L'iniziativa haja restrenschì l'offerta d'immobiglias venalas.
Ils pretschs vegnian a crescher er quest onn – dentant pli pauc che l'onn passà.
