Siglir tar il cuntegn

Header

video
Nua dessi protecziun en cas da guerra ?
Or da Telesguard dals 08.03.2022.
laschar ir. Durada: 3 minutas 59 Secundas.
cuntegn

Guerra en l'Ucraina Nua è mia plazza da refugi?

Hai jau insumma ina plazza da refugi e nua sa chatta quella? Questa dumonda ha l’Uffizi da militar e da protecziun civila a chaschun da la guerra en l’Ucraina respundì insaquantas giadas quests ultims pèr dis.

La buna novitad gia oravant: mintga Grischuna e Grischun ha ina plazza da refugi en cas extraordinari. Il Grischun saja schizunt quel chantun cun il pli grond grad d’occupaziun tar ils tschalers da protecziun. Pervia dal turissem pudessan ins numnadamain repartir bunamain tut la populaziun dal Grischun ina giada e mez sin ils passa 12’000 tschalers da protecziun che sa chattan en noss chantun.

Quai èn per gronda part tschalers en possess privat e lura anc tschalers publics suttamess a las vischnancas. Pia, betg mo in e mintgin haja in plaz da refugi durant in cas extraordinari, mabain saja il Grischun era pli che pront per ina tala situaziun.

audio
Co funcziuni cun ils tschalers da protecziun en il Grischun?
ord Actualitad dals 08.03.2022.
laschar ir. Durada: 2 minutas 55 Secundas.

Nua precis è mes tschaler?

Era sche l'Uffizi da militar e da protecziun civila haja durant ils ultims dis infurmà a varga 200 persunas preoccupadas nua che lur tschaler da protecziun sa chatta, na vegnia tar tschalers publics da principi betg communitgà co la repartiziun da la populaziun vesa ora en detagl. Causa las diversas mutaziuns da domicil na fiss ina tala repartiziun numnadamain mai propi dal tuttafatg à jour. Quella capita pir tar in cas extraordinari e pir sin cumond da la Confederaziun.

Dentant garantescha l’uffizi a tuttas e tuts che n’han betg in tschaler da protecziun en chasa in lieu da refugi, e quai betg pli lunsch davent che trais kilometers dal lieu d’abitar.

 

RTR actualitad 17:00

Artitgels legids il pli savens

Scrollar a sanestra Scrollar a dretga