Zezras vul cumbatter l'amur svelta al ur dal Rain

Il lieu da repaus «Apfelwuhr» tar Zezras è enconuschent sco inscunter per nudists e per l'amur svelta. Quai duai sa midar. La vischnanca lascha installar tavlas cunter la mulesta.

Il lieu da repaus a l'ur da l'autostrada a Zezras

Legenda da maletgs: Il lieu da repaus a l'ur da l'autostrada a Zezras RTR, F. Caduff

Sch'ins tschertga «Raststätte Zizers» sin Google chatt'ins sco quart resultat: «Parkplatzsex, Autosex, Sexdaiting» ed in avis sin la plazza da repaus a Zezras. Il president communal da Zezras, Peter Lang ha ditg en in'intervista dal schurnal regiunal da SRF ch'i na disturbi betg el sche la glieud fetschia l'amur en il zuppà. Sche quai succedia dentant publicamain na possia la vischnanca betg tolerar quai. La stad passada haja dà pliras reclamaziuns en quest connex.

Chattar ina schliaziun n'è betg uschè simpel

L'Uffizi federal per vias ASTRA, l'uffizi da construcziun bassa, la polizia chantunala e la vischnanca da Zezras èn s'inscuntrads per chattar ina schliaziun. Els èn vegnids a la conclusiun ch'i na possian betg far la massa. Per Zezras è quai ina situaziun dischillusiunanta, ha punctuà il president. Els n'hajan nagina pussaivladad d'intervegnir activamain. Sulettamain la polizia possia dar chastis, e quai, mo sch'els vesan persunas gist en acziun.

Zezras spera sin l'effect d'ina tavla

La vischnanca ha uss decidì da plazzar tavlas al lieu pertutgà. Quellas admoneschan las persunas e supplitgeschan da sa cumportar andantamain sin il lieu da repaus. La vischnanca spera che la tavla fetschia effect.