Rosita Huber-Mirer viva dapi 12 onns cun la diagnosa cancer dal sain. Ella è naschida 1956 a Trun, ella è tgirunza, ha dus uffants creschids e dus biadis e viva cun ses um a Cazas.
Mo betg murir!
La diagnosa cancer dal sain ha Rosita Huber-Mirer survegnì cura ch’ella aveva 49 onns, ed ella aveva era metastasas en il lom, en il dir ed en ils nufs limfatics. Ses emprim patratg tar la diagnosa è stà «Mo betg murir»! L’onn 2011, pia 6 onns suenter la diagnosa, è ses cudisch «Himmel – ich komme später» cumparì.
In cudesch per far curaschi
En quest cudesch sa fatschenta Rosita Huber-Mirer a moda persunala cun la malsogna maligna. Tge munta quai da patratgar mintga di vid il cancer? Tge dat curaschi al pazient, ma era als confamigliars? Èn ins propi pertutgà tut sulet? Èsi schizunt pussaivel da vesair ina vart positiva tar quai culp da destin, cancer?
Tina Aschwanden porscha protesas da sain
Avant 50 onns ha Tina Aschwanden fatg in emprendissadi en il salun da corsets tar ses geniturs a Cuira. Quel purscheva tranter auter schon protesas da sain. Cura che la mamma è vegnida pensiunada è Tina Aschwanden sa decidida d’avrir ina fatschenta a Domat e sa spezialisar sulettamain sin protesas da sain e portasains spezials, per gidar las dunnas.
Entschatta crappusa
Ils medis eran dentant da l’avis, che las dunnas na dovrian betg protesas, ellas possian bain metter sdratscha u fazielets en il portasain. 10 onns ha Tina Aschwanden stuì tegnair la dira, avant ch’ils medis han percurschì che protesas da sain èn necessarias. Betg mo per la psica, mabain era per la sanadad dal dies.
La medischina è sa sviluppada
Ozendi vegn amputà bler pli darar l’entir sain. Protesas dovri dentant tuttina. Sch’ils medis prendan davent il cancer, sa mida il sain. El vegn pli pitschen ed i dat magari foras. Perquai datti ozendi protesas pli finas, che fan ch’ils sains vesan ora medem gronds e ch’el ha ina bella furma.
Magari patesch jau cun las dunnas
Malgrad che Tina Aschwanden ha gronda experientscha cun ses 66 onns e 35 onns fatschenta, na vegn ella betg da sa distanziar avunda da las dunnas. Lura stoppia era ella bragir. E cura che ses um è mort da cancer avess ella bunamain serrà la fatschenta. Suenter ina pausa da mez onn haja ella dentant puspè lavurà cun nov schlantsch e motivaziun. Ella charezzia sia clamada e las reacziuns da las dunnas valian uschè bler ch’ella possia viver da sa fatschentar di per di cun il tema cancer.
RR actualitad 07:00+
