Il 2017 han ins racoltà en il Grischun 12% pli paucas ivas da vin ch'en media. Il «Bündner Tagblatt» commentescha quai sco «meglier che spetgà». Durant il temp da racolta tranter ils otg da settember ed ils 26 d'october han ins pia racoltà dapli che quai ch'ins aveva spetgà suenter la schelira tardiva l'avrigl. Effectiv ha la vendemia furnì 19'631 liters vin u 13 buttiglias a 7,5 dl per mintga Grischun. Damai èsi la terza giada en successiun che la racolta è sut la media. Dapi il 2000 hai dà sulet trais onns cun ina racolta pli pitschna.
Betg bun – dentant meglier ch'autras regiuns
En cumparegliaziun cun auters chantuns è quai dentant in bun resultat. Uschia han ils chantuns Basilea-Citad, Basilea-Champagna e Soloturn gì ina vendemia per 78% pli bassa ch'en media.
La racolta grischuna da quest onn è dentant stada colliada cun grond engaschi: Las malsognas d'iva Botritis e smarschim d'aschieu han difficultà la lavur dals racoltaders. E la fin finala èn quellas malsognas probablamain er stadas responsablas per 5 fin 10% da la perdita da racolta. Il smarschim d'aschieu è dentant ina malsogna ch'i na dat tenor il cumissari da viticultura betg uschè savens en la Vallada dal Rain. Ins suppona ch'il motiv saja l'aura disfavuraivla dal settember en cumbinaziun cun las ivas plainas e madiras.
RR novitads 09:00