Siglir tar il cuntegn

Header

video
Ins quinta cun bun onn da vin – deplorescha però mancanza da persunal
Or da Telesguard dals 22.09.2022.
laschar ir. Durada: 3 minutas 53 Secundas.
cuntegn

Vendemia 2022 Viticulturs e viticulturas quintan cun buna qualitad e quantitad

Malgrà ch'i saja anc baud da far bilantscha, guardi ora bain fin fitg bain per la vendemia 2022. Quai ha Ueli Liesch, president da l'Uniun tetgala dals viticulturs grischuns, ditg envers RTR. La quantitad sco er la qualitad saja buna. Uschia quinta Liesch ch'i dettia in fitg bun vin quest onn.

Ils motivs per la buna qualitad e quantitad è la bell'aura durant l'entir onn, e che las ivas na pateschan betg da malsognas sco auters onns. Las ivas sajan bellas, di Ueli Liesch. Per blers viticulturs e viticulturas en il Grischun è quai in grond levgiament. Las vendemias dals ultims onns eran stadas per part plitost mediocras.

audio
Viticulturs quintan cun bun onn, malgrà mancanza da persunal
ord Actualitad dals 22.09.2022.
laschar ir. Durada: 3 minutas 4 Secundas.

Sfida da chattar persunal che gida

Malgrà che l’onn 2022 empermetta da vegnir in bun u perfin fitg bun onn, han ils viticulturs e las viticulturas en il Grischun tuttina da cumbatter cun sfidas. Per exempel la sfida da chattar avunda persunal tar la racolta da las ivas. Quai conferman Ladina Obrecht da Jenins sco er Ueli Liesch da Malans.

Ils blers che vegnan gugent èn bainprest memia vegls. Ed ils giuvens, lezs lavuran bler dasperas.
Autur: Ladina Obrecht viticultura Jenins
Blera glieud lavura ozendi parzialmain e n’è betg pronta da vegnir in’entir’emna a gidar.
Autur: Ueli Liesch President Uniun tetgala viticulturs grischuns

Uschia manca tar blers la peda ubain ch'els èn memia pauc flexibels. Ozendi lavuran blers viticulturs cun agid da maschinas e cun persunal professiunal per dar dumogn a la vendemia. Quai na saja dentant betg la dretga soluziun en il Signuradi, uschia Liesch. Per racoltar la sort Pinot Noir dovria quai anc adina lavur a maun per mantegnair la buna qualitad durant la racolta.


Ord l'archiv (1965)

video
Vendemia 1965 a Maiavilla, Fläsch, Jenins e Malans
Or da RTR dals 08.11.1965.
laschar ir. Durada: 3 minutas 8 Secundas.

RTR actualitad 17:00

Artitgels legids il pli savens

Scrollar a sanestra Scrollar a dretga