Siglir tar il cuntegn
Inhalt

Valladas talianas Ussa guarda Regiun Bernina dal rument da Poschiavo e Brusio

Il suveran da la Regiun Bernina ha confermà la surdada dal contract da prestaziun a la nova Regiun Bernina. Per in gea hai vulì il consentiment dad omaduas vischnancas en la Valposchiavo.

sacs da rument e container
Legenda: Per ils proxims 10 onns è la gestiun da rument lezia da la Regiun Bernina. ilgrigione.ch

Cun 56% han ils votants da Poschiavo ditg gea a la gestiun regiunala da rument. Anc bler pli clera è la decisiun stada tar il suveran da Brusio ch'ha approvà la missiva cun 82%. Sco quai ch’il president communal da Poschiavo, Alessandro Della Vedova, ha ditg a RTR, è la decisiun in cler indizi per in spiert regiunal intact.

Punct dispitaivel: Surdada da las lavurs

Tar la surdada dal contract da prestaziun da las duas vischnancas Brusio e Poschiavo a la nova Regiun Bernina, aveva l’interpresa che n’ha betg survegnì la lavur fatg plant tar il Tribunal administrativ. Punct dispitaivel è il fatg che l’anteriura Regione Valposchiavo – e betg la Regione Bernina – aveva definì, tgi che vegn a gestiunar ils proxims 10 onns il rument da tut la val.

Vuschar separà duas giadas

Ultra da quai avessan ils abitants da la Valposchiavo gì da votar tenor il recurrent separadamain davart la surdada da l'incumbensa a la Regiun Bernina e davart la surdada ad in’interpresa. Il Tribunal administrativ ha però declerà che la votaziun na vegn betg spustada. Causa che la chaussa n’è anc betg tractada a fin, avess il Tribunal anc la pussaivladad da declerar la decisiun da dumengia per betg valaivla.

RR novitads 12:00