Ulteriura crudada da crappa al Piz Cengalo

En il territori da bova en la Val Bregaglia è danovamain vegnì giu crappa. La crappa n'è questa giada però betg vegnida giu fin en il vitg.

Chavaterra en la bova a Bondo.

Legenda da maletgs: Situaziuns sco a Bondo pudessi en l'avegnir era dar en ulteriuras parts da las Alps. Keystone

Il glindesdi saira è en il territori da bova en la Val Bregaglia puspè vegnida giu crappa. Quella crappa n'è dentant betg arrivada fin giu en la val. Quai han confermà las autoritads da la vischnanca Bregaglia envers RTR.

Radund 200'000 meters cubic crappa en il batschigl da rimnada

En il batschigl èn sa rimnads actualmain da quai da 200'000 meters cubic crappa. Per rumir quella crappa ha il chantun segnà duas novas deponias. Ina pli pitschna sa chatta giu en la val ed ina pli gronda vi da la costa.

Quellas ston uss vegnir preparadas, vul dir il humus vegn purtà davent. Pli tard vegn quel lura puspè duvrà per cuvrir la crappa, uschia ch'il terren d'agricultura è puspè utilisabel. La pitschna deponia duess esser pronta gia mesemna.

Ulteriura orientaziun da la populaziun il mardi suentermezdi

Il mardi suentermezdi ha lieu a Vicosoprano in'orientaziun per la populaziun da Bondo. Las autoritads communalas ed ils dus cussegliers guvernativs Christian Rathgeb e Mario Cavigelli vegnan ad orientar davart la situaziun actuala.

Anc na po l'armada betg gidar

Pervi dal privel memia aut na dastga l'armada svizra betg anc intervegnir, er sche la schuldada fiss pronta a Bondo. Quai ha ditg il cusseglier guvernativ Christian Rathgeb. El ha accentuà, che radund in milliun meters cubic material al Piz Cengalo possian rumper giu da tut temp.

Il cusseglier federal Guy Parmelin haja bain empermess agid, ils commembers da l'armada stoppian dentant pudair ir en segirtad entaifer quatter minutas. Quai na saja betg pussaivel il mument.

Situaziun a Bondo vegn evaluada permanentamain

Truppa da salvament a Bondo.

Legenda da maletgs: Truppa da salvament a Bondo. Keystone

Sco Yves Bonanomi, il geolog responsabel al Piz Cengalo, ha ditg a SRF vegnia quai era a dar ils proxims dis pitschnas crudadas da crappa ed i vegnia a durar in temp pli lung fin che la situaziun saja sa calmada dal tuttafatg.

Il mument na possian ins betg dir, cura ch'il milliun meters cubic grip restant vegnia a val, ha ditg Bonanomi. La sonda avevan las autoritads annunzià ch’ellas hajan stuì dar si la tschertga suenter las otg persunas sparidas.

Polizia examinescha avertiment a Bondo

La bova gronda da Bondo cun probablamain otg morts vegn er examinada da la polizia. I va per la dumonda, sch'ils viandants sajan vegnids avertids bain avunda dal privel enconuschent d'ina bova. Quai communitgescha la polizia. La procura publica dal Grischun saja orientada.

Tenor la presidenta communala da Bregaglia, Anna Giacometti, ha la vischnanca plazzà pliras tavlas sper las sendas da viandar ch'han avertì dal privel da vita entras bovas u crudada da crappa. Vitiers hajan ils possessurs dad aclas en la Val Bondasca survegnì brevs d'avertiment.

Pli che 100 paraids da crappa svizras vegnan controlladas 24 uras/di

Ina sumeglianta catastrofa cun crudada da crappa sco a Bondo en la Val Bregaglia poi era dar en ulteriuras parts da las Alps. Uschia vegnian sulet en las Alps 100 paraids da crap controlladas 24 uras a di, scriva la SonntagsZeitung.

Era dettia plirs sistems d’alarm per talas bovas sco a Bondo. Il pli fitg pertutgads vegnan ad esser ils chantuns da Berna e Vallais ma er il Grischun, scriva la SonntagsZeitung.

RR novitads 06:00++