Siglir tar il cuntegn
cuntegn

Valladas talianas Ulteriura bova a Bondo

Las fermas plievgias la notg da gievgia sin venderdi han laschà ir pliras bovas en la Val Bregaglia val in'ulteriura bova sur il vitg da Bondo. La via è vegnida bloccada cun material ed ha stuì vegnir serrada.

Ina nova bova sa derscha a val a Bondo.
Legenda: Ina nova bova sa derscha a val a Bondo. Mattia Capezzoli/RSI

La nova bova è vegnida da las 21.30

Las fermas plievgias da la notg passada han laschà ir a val in'ulteriura bova sur il vitg da Bondo. Sco RSI scriva online saja il batschigl da retegniment vegnì emplenì e per part ì surora. Quest batschigl era vegnì svidà ils davos dis dal material da las emprimas bovas. Tenor infurmaziuns dad SRF datti abitants che bandunan il territori enturn Bondo e Promontogno. La forza electrica saja interrutta, i saja stgir a Bondo ed a Promontogno.

Autoritads avertì

Las autoritads da la vischnanca da Bregaglia avevan avertì d'ulteriuras bovas ord la Val Bondasca pervia da las plievgia. Plinavant era vegnì avertì da sa tegnair si en il territori privlus. Bleras persunas han bandunà voluntariamain la zona periclitada en Bregaglia.

Betg panica, ma prevenziun

Las plievgias intensivas, ch'ils meteorologs han prevesì per la notg da la gievgia fin il venderdi a mezdi augmentian il ristg dad ulteriuras bovas che pudessan cuntanscher er Bondo.

Lingia electrica paquettada en.
Legenda: Er las lingias electricas èn vegnidas protegidas cunter aua e belma. RTR, david spinnler

Quai scriva il comune di Bregaglia en ina communicaziun a las medias. Duas chasas vischinas da la chasa communala a Promontogno vegnian preparadas per in'eventuala evacuaziun.

Svidar il batschigl da retegniment è il pli urgent

Al mument saja il pli impurtant da svidar il batschigl da retegniment per ch'i dettia spert nov spazi per material dad eventualas bovas novas. Quai vegnia fatg cun 16 baggers e radund 20 camiuns fitg gronds, di David Spinnler.

El è actualmain sper la chasa communala Bregaglia. Quella è bain a Promontogno, dentant gist sper il batschigl dal flum Bondasca e cun quai mo pauc sur la bova.

Duas fanestras serradas.
Legenda: L'Hotel Bregaglia n'avra questa stagiun betg pli. RTR, david spinnler

Hotel Bregaglia serra per questa stagiun

Fertant ch'auters sa preparan per in temp transitori, serra l'Hotel Bregaglia gist dil tuttafatg per questa stagiun. Els hajan tantas annulaziuns, ch'i na rendia betg da laschar avert.

RR actualitad 17:10

Per gidar a Bondo:

Il logo da la chadaina da fortuna.
Legenda: RTR

La chadaina da fortuna ha endrizzà in conto da donaziun per Bondo. Per gidar datti differents access:

  • La pagina d'internet www.glueckskette.ch
  • L'app «Swiss Solidarity»
  • Conto da posta 10-15000-6 cun l'avis «Bondo»
  • Ils cedels da pajament sin mintga posta en Svizra