Schef da polizia grischuna vegn en il radar

Il schef da la polizia da la regiun Mesolcina è charrà memia spert sin in viadi da lavur. La consequenza: in chastì da 800 francs. El sez ha confermà in rapport dal portal online da la gasetta tessinaisa “La Regione”.

Cun 23 km/h memia spert da viadi.

Legenda da maletgs: Cun 23 km/h memia spert da viadi: Schef-policist sto pajar in chastì dad 800 francs. Keystone

El era da viadi a Tavau per la lavur. Sin la via principala tranter Tusaun e Casti haja el surpassà in camiun. Curt avant Casti saja ses auto lura vegnì mesirà cun ina pistola da radar d’in collega. Suenter avair tratg giu la toleranza è il schef da la polizia stà da viadi cun 23 km/h memia spert. Là nua ch’el ha surpassà il camiun fissan stads lubids 80 km/h.

Il schef-policist ha commentà ses cas sco exempel ch’il stadi da dretg funcziunia. Il chastì mussia che la Svizra tractia tuts tuttina. Vegn il schef-policist anc ina giada traplà ch’el charrescha memia spert, sto el dar giu il bigliet.