Siglir tar il cuntegn

Header

cuntegn

Valladas talianas San Bernardino: Territori da skis resta serrà

Ils implants da skis da San Bernardino restan serrads era questa stagiun d’enviern. Quai ha confermà ad RTR Christian De Tann, il sindaco da la vischnanca da Mesocco. Igl è gia il quart onn en seria, ch’ils implants èn serradas.

Tenor in rapport da la gasetta «Giornale del Popolo», hajan investiders da la Germania gì suttascrit ina decleraziun d’intenziun da vulair investir 40 milliuns en il territori da skis ed en in project d’hotellaria. Perquai che garanzias finanzialas na sajan betg vegnidas cuntanschidas, saja il concept da turissem ussa vegnì sutterrà, scriva la gasetta da la Svizra taliana.

Vischnanca ha gì nagin contact cun investiders potenzials

Sco quai ch’il president communal da Mesocco ha ditg sin dumonda, na sappia el da tut nagut. La vischnanca na saja mai vegnida confruntada cun ina dumonda dals investiders potenzials, ha Christian de Tann confermà ad RTR. Uschè spert ch’i dettia novas en chaussa, vegnia la vischnanca a communitgar davart l’avegnir dal territori da skis a San Bernardino. L'idea saja anc adina l'intent da puspè avrir ils implants da skis en l'avegnir.

Artitgels legids il pli savens