Siglir tar il cuntegn

Header

cuntegn

Valladas talianas Pult: «Center da controlla a San Vittore na tanscha betg»

A San Vittore en il Mesauc avra il venderdi in nov center da controlla per traffic grev. Ils camiuns che vulan far viadi sur il San Bernardino vegnan pia en il futur è controllads sch'i vegnan nà dal sid. Fin uss deva quai be in center da controlla a Realta ed in en l'Uri sin la ruta dal Gottard.

Il center a San Vittore è l'emprim center da controlla per il traffic grev da la vart sid da las alps. Fin uss deva quai sin la ruta dal San Bernardino be a Realta in center ed en l'Uri sin la ruta dal Gottard. Finalmain dettia quai uss er controllas per il traffic che deriva dal sid, uschia Jon Pult, il president da l'iniziativa da las alps.

audio
Mezdi: In nov center per controllar traffic grev
ord Actualitad dals 28.09.2018.
laschar ir. Durada: 2 minutas 6 Secundas.

In emprim pass

Jon Pult s'engascha er per ulteriurs centers: Cunzunt da la vart dal sid dal Gottard fiss in tal center fitg impurtant per augmentar la segirtad sin las vias Svizras, di il president da l'iniziativa da las alps.

Sper quai dovria quai dentant er controllas moviblas. Quellas possian procurar per che quels camiuns che van tras la Svizra sajan segirs e per ch'ils chauffeurs hajan er durmì avunda, uschia Jon Pult. En pli saja quai er impurtant che la viafier na vegn betg dischavantagiada.

Las controllas sin ils binaris sajan actualmain bler pli rigurusas ed i saja impurtant che las controllas sin via vegnan er uschia strictas. Gia il 2003 haja il Cussegl federal empermess a la Svizra ch'i dettia sin tut las rutas nord-sid controllas dal traffic grev.

Il center a San Vittore saja in emprim pass, uschia Jon Pult – la finamira na saja dentant anc ditg betg cuntanschida.

RR actualitad 12:10

Artitgels legids il pli savens