1'844 votantas e votants èn stads a l'urna per decider davart il president communal da Poschiavo. 1'663 cedels da vuschar eran valaivels e sin quels stà in verdict cler: Il sfidader Giovanni Jochum (PLD) ha fatg 1'041 vuschs e distanziescha uschia cleramain il president communal actual Alessandro Della Vedova (PCD) ch'ha fatg be 622 vuschs.
Il resultat cler surprenda er a Della Vedova e Jochum
En l'intervista cun RTR sa mussan ils dus contrahents medemamain surprendids dal resultat cler da la vischnanca cun radund 3'500 abitantas ed abitants. Ils da Poschiavo hajan vulì in midament, di il president communal nov-elegì Giovanni Jochum. Uss saja el cuntent dad avair anc temp per sa leger en en ils dossiers da la vischnanca.
Da l'avegnir vul il president actual Alessandro Della Vedova percunter betg anc discurrer. El avess gugent anc lavurà vinavant per sia vischnanca e quai che vegnia per el vegn ins a vesair lura, di Della Vedova:
En in’emprima reacziun curt suenter gentar aveva gratulà Alessandro Della Vedova a ses successur ed engrazià al suveran per la fiduzia dada ils 8 onns passads:
Per Alessandro Della Vedova èsi ina terrada dira da stuair dar giu il presidi communal suenter duas periodas d'uffizi. El n'è betg be sco deputà en il Cussegl grond, ma schizunt sco vicepresident e vegn ad exequir quel uffizi l'onn che vegn senza avair ina funcziun en la politica communala.
Giovanni Jochum (PLD) è vegnì elegì quest onn dal Puschlav sco deputà en il Cussegl grond. Uss al èsi gartegià gia il proxim success tar il suveran.
Jochum ha gì dapi il 1993 diversas funcziuns en il concern d’energia Repower. Dal 1998 fin il 2016 è el stà commember da la direcziun da Repower. Il 2017 ha el confundà a Puntraschigna in’interpresa da revisiun e consultaziun d’interpresas ch’el presidiescha er.
Ch'il suveran ha gì questa giada ina tscherna a l'elecziun è era sa mussà en sia participaziun: 70,52% da las burgaisas ed ils burgais èn ids a l'urna.
RR actualitad 12:00+