Siglir tar il cuntegn
cuntegn

Valladas talianas Pliras bovas en Bregaglia – colliaziun interrutta

Las fermas plievgias la notg da gievgia sin venderdi han laschà ir pliras bovas a val en Bregaglia. Ina bova gronda ha cuntanschì la notg Bondo e donnegia pliras chasas. Ed la fracziun da Spino ha stuì vegnir evacuada. La via èn Bregaglia è interrutta en plirs lieus.

Il moviment giu dal Piz Cengalo envers la val ed il vitg da Bondo.
Legenda: Il moviment giu dal Piz Cengalo envers la val ed il vitg da Bondo. RTR grafica
  • La notg da gievgia sin venderdi èsi vegni al Piz Cengalo danovamain a crudada da crappa.
  • A Bondo è alura a gievgia saira ina nova bova vegnida a val ed ha bloccà la via chantunala veglia e nova ed era empleni puspè il batschigl.
  • A Spino gist dasper Bondo ha la populaziun stuì vegnir evacuada. Naginas persunas èn vegnidas blessadas. Duas persunas ha in helicopter stuì evacuar.
  • En il nord da Vicosoprano ha in dutg purtà glera ed ha bloccà la via principala tranter Vicosoprano e Casaccia. Uschia che la val è dal tuttafatg isolada.
La situaziun da la bova a Bondo, Spino e Promontogno.
Legenda: La situaziun da la bova a Bondo, Spino e Promontogno. RTR grafica

Spino era evacuà

Era la via chantunala veglia da la vart sanestra da la val è vegnida bloccada. Ils abitants ed ils osps d’in alloschi en la fracziun Spino han stuì vegnir evacuads. Duas persunas pli veglias han stuì vegnir evacuadas da la Rega ma ellas n’èn betg blessadas, scriva la vischnanca da Bregaglia. En la fracziun Spino èn pliras chasas donnegiadas ed era a Sottoponte sco era a Bondo.

Via principala en plirs lieus interrutta

Il venderdi en damaun è ina ulteriura bova vegnida fin sin la via chantunala tranter Vicosoprano e Casaccia. La via è uss era qua bloccada sin ina lunghezza da plirs 100 meters. La situaziun na possia il mument betg vegnir evaluada da nov, pir en il decurs dal avantmezdi possian ins trair ina bilantscha da la notg passada, ha ditg Christian Gartmann responsabel per la communicaziun dal stab da crisa a RTR.

Bova cuntanscha danovamain Bondo

Las fermas plievgias da la notg passada han laschà ir a val in'ulteriura bova sur il vitg da Bondo. Sco RSI scriva online saja il batschigl da retegniment vegnì emplenì e per part ì surora. Quest batschigl era vegnì svidà ils davos dis dal material da las emprimas bovas. Tenor infurmaziuns dad SRF datti abitants che bandunan il territori enturn Bondo e Promontogno. La forza electrica saja interrutta, i saja stgir a Bondo ed a Promontogno.

Las autoritads han avertì

Las autoritads da la vischnanca da Bregaglia avevan avertì d'ulteriuras bovas ord la Val Bondasca pervia da las plievgia. Plinavant era vegnì avertì da sa tegnair si en il territori privlus. Bleras persunas han bandunà voluntariamain la zona periclitada en Bregaglia.

RR actualitad 06:00++