Tgi che sajetta uss in portg selvadi, sto laschar intercurir l’animal d’experts dal chantun sin radioactivitad. La raschun ch’i dat portgs selvadis radioactivs en il Grischun è la catastrofa nucleara da Tschernobyl avant passa 30 onns. Da lezzas uras è in nivel sa distgargià sur il Tessin e las valladas dal sid en il Grischun. Restanzas radioactivas chattan ins anc oz en quellas regiuns – numnadamain surtut en bulieus.
Bulieus contaminads
Quels bulieus contaminads vegnan lura magliads dals portgs selvadis. Uschia prendan ils animals si la radioactivitad en lur corp. Sch’ina chatschadura u in chatschadur sajetta uss portgs selvadis vegnan ils animals intercurids d’experts dal chantun. Sche la radioactivitad surpassa ina limita, sto il cadaver vegnir dismess. Quai malgrà ch’i n’è betg privlus, sch’ins mangia be ina giada charn contaminada, declera il chemicher chantunal, Matthias Beckmann.
Malsegir per la sanadad u betg?
Sch’ins mangia dentant sur pli lung temp charn contaminada n’è quai insumma betg sanadaivel. Per evitar ina tissientada, ston tut ils cadavers contaminads vegnir dismess, declera Matthias Beckmann.
Cumpensaziun dal chantun
Chatschaduras e chatschadurs che na pon betg salvar u vender la charn da lur preda, survegnan ina cumpensaziun pauschala dal chantun.