M13 haja adina puspè tschertga pavel datiers e perfin en ils vitgs dal Puschlav. El saja vegnì adina pli domestic – era suenter sia sien d'enviern. M13 saja daventà in risico per la populaziun. Uschia argumentescha l'uffizi da chatscha dal Grischun la decisiun da sajettar l'urs.
M13 ha procurà per lingias grassas
Emprims fastizs d'in urs han chatschadurs vesì l'avrigl passà en la Val S-charl en l'Engiadina Bassa. Suenter ch'el ha sblundregià plira masainas e stgarpà nursas ha el survegnì in cularin ed è stà sut surveglianza.
M13 ha dentant era procurà per lingias grassas in zic pli curiusas: El ha gidà a sclerir in mazzament sin il cunfin tranter l'Austria e l'Engiadina Bassa – quai enten derscher ina planta e chaschunar in incendi da guaud. En la vischinanza ha la polizia lura chattà ina bara. E l'urs M13 ha era gì in accident cun la Viafier retica ed ha survivì.
Inscunter fatal
La sentenzia da mort è dentant probabel stà l'inscunter d'avant in pèr dis cun ina matta da 14 onns en il Puschlav: Era suenter sia sien d'enviern n'ha l'urs mussà nagina tema da carstgauns.
M13 è il segund urs ch'è vegnì sajettà en il Grischun. L'avrigl 2008 vevan ils responsabels sajettà JJ3 – medemamain in urs ch'era immigrà da l'Italia dal nord. M13 duai tenor emprimas infurmaziuns vegnir exponì sper JJ3 en il Museum da natira a Cuira.
Trumpà da la mort
WWF Svizra è trumpà da la mort da l'urs en la Val Puschlav. M13 saja vegnì sajettà memia baud. I fiss stà d'intensivar las mesiras per spaventar l'urs, ha ditg l'experta dad urs dal WWF, Joanna Schönenberger.
Cuntrari a l'urs JJ3 ch'è vegnì sajettà il 2008, na saja M13 betg stà in urs da problem, scriva il WWF Svizra. Ch'el saja vegnì sajettà giu haja da far cun la pitschna acceptanza da l'urs en la Val Puschlav.
Pro Natura deplorescha la mort dad M13 e pretenda in engaschi pli ferm dal chantun per che las regiuns sajan preparadas meglier per futuras visitas dad auters urs.