Siglir tar il cuntegn
cuntegn

Valladas talianas Incendi en Val Mesauc: La situaziun resta privlusa

En ils territoris da l'incendi n'haja dà nagina plievgia u naiv, vitiers dettia entras il vent dal nord puspè in privel pli grond ch'ils cuaditschs piglian danovamain fieu. Pia anc nagin levgiament per ils pumpiers en acziun.

Purtret d'in Super-Puma che chargia aua.
Legenda: Ils helicopters ston era il 7avel di cuntinuar da stizzar cuaditschs en Val Mesauc. Keystone

Avant gliendisdi veseva tenor l'aviatica militara or sco sch'ils incendis fissan stiz u sut controlla. Ma sgols da controlla hajan mussà ch'i dettia anc adina cuaditschs fitg gronds. Uschia pudess il guaud puspè cumenzar a brischar damai ch'il funs saja anc adina fitg sitg.

Tenor infurmaziun da l'aviatica militara èn puspè trais Super-Pumas vid lavurs da stizzar en ils lieus da l'incendi. In ulteriur helicopter n'haja anc betg pudì parter pervi da la brentina. Quest quart helicopter è equipà cun ina camera termica che mesira la chalur.

Il mument èn 40 enfin 60 pumpiers en acziun en il territori pertutgà. Ils helicopters duain anc esser en funcziun enfin mesemna. Suenter duai quai anc ina giada dar ina nova evaluaziun da la situaziun.

Sur ils guauds pertutgads valia anc adina scumond da sgular. Il scumond era vegnì relaschà da l'uffizi federal per aviatica civila.

Incendi pitschen en Val Calanca

Er entadim la Val Calanca a Rossa hai dà oz enturn mezdi in incendi da cultira. Il fieu è stà svelt sut controlla. Tenor la polizia chantunala hai probabel brischà pervi d'in defect d'ina lingia d'electricitad.

RR novitads 11:00+