Ina bartga per la Valposchiavo

L’associaziun «Amici del Lago» ha realisà in project sin basa privata che prevesa d’introducir ina bartga sin il Lai da Poschiavo. Cun la commembranza da bun 50 persunas ha la societad ramassà aifer be dus mais passa 120'000 francs, per cumprar il bastiment che porscha stgars 50 plazs.

Laschar ir video «Transport extraordinari sur il Pass dal Bernina»

Transport extraordinari sur il Pass dal Bernina

1:00 min, dals 30.9.2015

«Las ideas per duvrar la bartga turisticamain èn multifaras», ha declerà Marcello Gervasi, in dals trais iniziants da l'associaziun «Amici del Lago» e responsabel per las reservaziuns. Uschia na possian ins betg mo simplamain prender a fit la bartga «Sass’Albo» per in gir sin in lai, mabain er duvrar ella per exempel per ina degustaziun da vin exclusiva. Cun la nova purschida vul ins augmentar l’attractivitad turistica en la val.

Bartga d’occasiun

Cun in convoi spezial escortà da la polizia chantunala è la bartga vegnida transportada sur dus pass fin a Le Prese. In transport extraordinari, cunquai che la bartga è bun 18 meters lunga.

La bartga fabritgada dal 1919 è vegnida amarada l’emprima giada en il Lai dals Quatter Chantuns. Durant ils proxims mais vul la societad «Amici del Lago» preparar la bartga «Sass'Albo» per sia emprima stagiun sin il Lai da Poschiavo a partir da la primavaira 2016.