«In cumenzament che na tanscha però betg»

La revisiun da la lescha prevesa sco midament il pli impurtant, che la vischnanca surpiglia las contribuziuns annualas per la promoziun dal turissem. Quai vul dir che hotels, restaurants, campadis ed affars da commerzi ed industria pon sa deliberar da la contribuziun annuala.

Val Bregaglia

Legenda da maletgs: Val Bregaglia RTR/ S.Derungs

Questa contribuziun stuevan els pajar dapi il 2010. Uss, en la situaziun economica difficila, vul la vischnanca dar sustegn e surpiglia perquai questas contribuziuns che van a favur dal turissem. I sa tracta da radund 120'000 francs.

Basegn d'agir

Il midament vegn beneventà dals pertutgads. «Quant che quai porta è dentant l’autra dumonda», di Jürg Wintsch che maina dapi 20 onn l’hotel Schweizerhaus a Malögia. Per el vul quai dir ch’el spargna radund 4‘500 francs l’onn – «ein Tropfen auf den heissen Stein» saja quai, uschia Wintsch. In cumenzament che tanscha tenor el dentant betg. La vischnanca haja sentì ch'ins stoppia far insatge e quai saja gia fitg positiv.

«  In bel regal che la vischnanca fa. »

Anna Giacometti
presidenta communala

Per la presidenta communala da la Bregaglia, Anna Giacometti è clar: mintga sustegn finanzial è gia in bel regal che la vischnanca fa a quels che profitan dal midament da la lescha. I duess esser in signal che la vischnanca vesa che la situaziun è difficila, i saja dentant betg la lezia da la vischnanca da gidar a l’infinit. Questa mesira po esser in emprim pass per chattar soluziuns e vala uschè ditg che la vischnanca stat finanzialmain bain.