Grond fieu en il Mesauc

En la Val Mesauc è rut ora il mardi saira in grond fieu da guaud. Quatter persunas han stuì vegnir evacuadas, conferma la polizia chantunala. Ulteriuras evacuaziuns pudessan suandar. Pervi dal fieu èn tant l'autostrada A13 sco la via chantunala serradas tenor la polizia fin oz a las diesch.

Il guaud brischa en la Val Mesauc.

Legenda da maletgs: Il guaud brischa en la Val Mesauc. Keystone

  • Da preschent brischia ina surfatscha 1'000 meters ladezza sin 600 meters da la costa si. Quai ha confermà la Polizia chantunala.
  • Infurmaziuns sur da blessads na dat quai naginas.
  • Dapi mesemna bunura las 8.00 vala in scumond absolut da far fieu en tut las valladas dal sid dal chantun Grischun. Avant era il privel d'incendis vegnì taxà sco «considerabel».
  • Curt avant las 18.00 dal mardi saira ha la polizia chantunala survegnì in'annunzia ch'il guaud tranter Mesocco e Soazza brischia.

Ils pumpiers da l'entira vallada èn al lieu. La raschun dal fieu n'è betg enconuschenta. Oz a bunura duain vegnir en acziun trais Super Pumas da l'armada e dus auters helicopters d'interpresas privatas per stizzar il fieu. La notg n'avevan ils helicopters betg pudì sgular.

Autostrada A13 e la via principala han stuì vegnir serradas

Pervi da privel da crappa èn tant l'autostrada A13 sco era la via chantunala H13 serradas tenor la polizia fin oz a las 10.

En la regiun dal Mesauc vala dapi intgins dis in privel da fieus da guaud stgalim 3 - privel considerabel. Ed ils davos dis ha in ferm favugn buffà en il Mesauc ed en autras regiuns da la Svizra taliana. Dapi mesemna en damaun las 8.00 vala en las valladas dal sid grischunas in scumond absolut da far fieu.

La carta da privel da fieu actuala en il Grischun:

Funtauna: www.gr.ch

Era en la Leventina brischa il guaud

En la vallada tessinaisa Leventina brischa medemamain il guaud. Las forzas da salvament han stuì evacuar 15 persunas.

RR novitads 06:00