Siglir tar il cuntegn

Valladas talianas Giuseppe Falbo daventa expert da la Confederaziun

Il secretari general da «La Pro Grigioni Italiano» Giuseppe Falbo duai represchentar las minoritads reticas en il Cussegl d’Europa. Là fa el part a la cumissiun consultativa, in organ ch'evaluescha e rapporta davart la situaziun da las minoritads en ils pajais europeics.

Giuseppe Falbo.
Legenda: Giuseppe Falbo è dapi il 2012 secretari general da la Pro Grigioni Italiano. RTR

Falbo è vegnì nominà sco expert da la Confederaziun en la Cumissiun consultativa da la cunvegna da basa per la protecziun da las minoritads naziunalas. Il comité da ministers dal Cussegl d’Europa haja approvà la nominaziun da Falbo, communitgescha la Pgi . El saja vegnì tscherni tranter in rudè da candidats proponids dal Departament federal da l'exteriur. Il cusseglier federal Ignazio Cassis persunalmain til ha lura surdà la buna novitad.

Visitar, evaluar, rapportar

Per quatter onns surpiglia il Puschlavin la plazza sco expert. Durant quest temp ha el sper diversas sesidas era l'incumbensa da visitar ils auters pajais. Al lieu dessan ses collegas ed el sa far in maletg da las minoritads. Quellas impressiuns ramassan els en in rapport che va al cussegl d'Europa, sco era al pajais sez.

En quel stattan però era propostas co ch'els pudessan megliurar la situaziun al lieu. En il rapport a la Svizra steva per exempel ch'i fiss bun da promover las medias rumantschas e talianas en Grischun. Il resultat final: In collavuratur da la SDA talian ha drizzà en ses biro a Cuira.

In um cun experientscha

Falbo è naschì il 1972 a Poschiavo, ha studegià politologia e dretg public a l’universitad da Berna. Il Puschlavin è dapi 12 onns secretari general da la Pgi. En sia funcziun ha el regularmain fatg part da las audiziuns dal Cussegl d'Europa.

Cussegl d'Europa

Il Cussegl d'Europa è in forum per debattas davart dumondas europeicas generalas. Sia finamira è da far cunvegnas liantas tranter ils stadis per uschia salvar ierta communabla e per promover il svilup economic e sozial. La Svizra fa dapi il matg 1963 part dal cussegl.

RR actualitad 07:00