Siglir tar il cuntegn
cuntegn

Valladas talianas Bregaglia: Nagina bova nova pli

La notg da venderdi sin sonda è stada ruassaivla a Bondo. Novas bovas n'hai betg dà. Il vitg da Bondo resta però vinavant cumplettamain evacuà. Il traject tranter Castasegna e Promontogno è vinavant serrà.

Legenda: Guardar il video Nagin paus per Bondo – la notg passada è vegnida la terza bova. Durada 02:10 minutas.
Or da Telesguard dals 01.09.2017.

La notg sin sonda n'hai dà naginas ulteriuras bovas a Bondo. Quai han communitga la vischnanca da Bregaglia sonda a bun'ura. Tuttina resta la situaziun en Val Bregaglia vinavant tendida. Bondo resta cumplettamain evacuà. Per sonda èsi planisà da svidar il rempar emplenì cun il material da bova. Las lavurs eran vegnidas interruttas il venderdi per motivs da segirezza.

Bova gievgia saira

Pervi da la plievgia ferma è danovamain crudà crappa dal Piz Cengalo. Da quella crudada da crappa è sa sviluppada ina bova, ch'è vegnida fin giu en il vitg da Bondo. Persunas n'èn betg vegnidas blessadas.

L'aua auta da la Maira periclitescha l'ultima colliaziun da via

Il nov material ha emplenì si il letg dal flum Maira. Perquai è il flum uss plirs meters pli aut che usità. Cun sia aua auta periclitescha la Maira l'ultima colliaziun tras la Val Bregaglia – numnadamain la via chantunala veglia. Sche la Maira schlavass tut il terren sut la via chantunala veglia fiss interrutta er l'ultima colliaziun tras la val.

Via po pir vegnida segirada, cur che la Maira è turnada en ses letg

Actualmain vegnia examinà co stabilisar la via chantunala veglia cun crappa gronda cunter vegnir schlavada dal flum, infurmescha la vischnanca Bregaglia vinavant.

La fracziun da Spino e la via chantunala veglia pon vegnir examinadas pir cur che la Maira curra puspè en ses letg. Quai vegn a durar plirs dis.
Autur: communicaziun a las mediasvischnanca Bregaglia

Bondo resta evacuà dal tuttafatg. In access na saja insumma betg pussaivel cun quai che la Maira ha inundà la punt a Bondo ed interrut uschia l'access al vitg.

Dimensiun da la bova da la notg passada vegn sclerida

Helicopters han il venderdi pudì sgular sur la regiun da bovas. Per l'ina han els transportà ils survegliaders sin lur posts e per l'autra han ils experts survegnì in'emprima survista da la bova da la notg passada. Las dimensiuns n'èn però anc adina betg enconuschentas.

La situaziun da la bova a Bondo, Spino e Promontogno.
Legenda: La situaziun da la bova a Bondo, Spino e Promontogno. RTR grafica

Pervi da la bova era vegnida evacuada la gievgia saira er la fracziun Spino. Duas persunas han stuì vegnir deliberadas cun agid da la Rega. A Bondo ed en las fracziuns Spino e Sottoponte èn vegnidas donnegiadas ulteriuras chasas.

Via principala Vicosoprano – Casaccia duai vegnir averta il venderdi saira

La via principala tranter Vicosoprano e Casaccia è vegnida inundada il venderdi en damaun da glera e crappa dad in dutg. Ella è vegnida bloccada sin ina lunghezza da plirs 100 meters. Tenor la communicaziun da la vischnanca fan las autoritads quint, da puspè pudair avrir ella in venderdi saira las 20:00.

La via cuvrida cun glera en il nord da Vicosoprano.
Legenda: La via cuvrida cun glera en il nord da Vicosoprano. RSI, Mattia Capezzoli

RR 14:00++

Per gidar a Bondo:

Il logo da la chadaina da fortuna.
Legenda: RTR

La chadaina da fortuna ha endrizzà in conto da donaziun per Bondo. Per gidar datti differents access:

  • La pagina d'internet www.glueckskette.ch
  • L'app «Swiss Solidarity»
  • Conto da posta 10-15000-6 cun l'avis «Bondo»
  • Ils cedels da pajament sin mintga posta en Svizra