Siglir tar il cuntegn

Header

video
Eveniment d'engraziament a Bondo
Or da Actualitad dals 06.05.2018.
laschar ir. Durada: 2 minutas 45 Secundas.
cuntegn

Valladas talianas Bondo di «grazia tant» per l’agid

Cun in eveniment d’engraziament ha la vischnanca da la Bregaglia envidà bun 800 persunas ad in inscunter a Bondo. Quai per signalisar quant ferm ch’ins ha apprezià tut il sustegn ed agid che la val ha gì immediat suenter la bova dals 23 d’avust 2017.

Ch’ins na veglia betg discurrer d’ina festa, ha suttastritgà la presidenta communala da la Bregaglia, Anna Giacometti. A chaschun da la bova or da la Val Bondasca, han numnadamain pers 8 persunas lur vita e numerus Bergagliots tut lur possess. Tuttina han ins vulì star ensemen per signalisar che la vita en val va vinavant, era sche tut n’è anc betg reglà e cumadà.

audio
Bunura: Bondo – Star da cumpagnia, sa regurdar ed engraziar
ord Actualitad dals 07.05.2018.
laschar ir. Durada: 3 minutas 45 Secundas.

Eveniment sponsurà

L’occurrenza a Bondo cun finalmain bun 540 persunas, en ina tenda muntada sin ina da las novas deponias suenter la bova, n’haja betg pajà la vischnanca da Bregaglia, ha precisà Anna Giacometti. La finanziaziun da l’eveniment, cun tschaina, concert e trategniment musical suenter, hajan pussibilità sponsurs: las vischnancas da Favugn e Rüschlikon, ina fundaziun ed in donatur privat.

Turnar en val

Sper ils abitants da Bondo, Spino, Sottoponte e Promontogno èn er viagiads numerus giasts da tut la Svizra en la Val Bregaglia. Sajan quai represchentants da l’armada svizra, commembers da colonas da salvament, sco er la regenza en la persuna da Mario Cavigelli. Mintgin dad els cun regurdientschas persunalas en connex cun la catastrofa natirala dals 23 d’avust 2017 ed ils dis suandants.

Grond’impressiun m’ha fatg la solidaritad e calma dals Bergagliots a las sairadas d’infurmaziun.
Autur: Mario Cavigelli president regenza grischuna

Impressiun ha er fatg als blers quant bain e svelt che tut las organisaziuns communalas han reagì. Ultra da quai vegn er adina puspè numnada la solidaritad che regna en la val laterala.

Pass per pass enavos en la normalitad

Cun pleds commovents ha Manuela Filli, abitanta da Bondo, laschà repassar ils davos mais da la vita en sia famiglia en la tenda fullanada. Dapi che ella ha gì da bandunar il dachasa a Bondo, viva la famiglia a Vicosoprano. En dus mais vulan ils Fillis dentant puspè turnar «a chasa» a Bondo, ha la mamma ditg cler e persvadida. Che quel pass saja impurtant per tuts per turnar puspè en la normalitad.

Adina cun in egl si vers la muntogna

Il batschigl da segirtad cun mirs da fin 9 meters autezza è entant puspè svidà e pront per tegnair si nov material che pudess vegnir giu dal Piz Cengalo. Ils sistems d’alarm èn en funcziun ed en cas da privel, vessan ils abitants anc d’avair temp per sa salvar, ha declerà Marcello Negrini, il schef da la gruppa da salvament en val. Dentant sa el er, che la natira è da principi betg calculabla.

RR actualitad 07:00

Artitgels legids il pli savens