Siglir tar il cuntegn

Header

video
L'Assicuranza d'edifizis ha infurmà en Bregaglia
Or da Telesguard dals 06.09.2017.
laschar ir. Durada: 1 minuta 40 Secundas.
cuntegn

Valladas talianas Abitants èn levgiads ch'ils custs vegnan surpigliads

L' Assicuranza d'edifizis dal Grischun ha infurmà ils abitants da Bondo e conturn davart la finanziaziun dals donns.

L'assicuranza d'edifizis è quest'emna a Stampa per cussegliar persunas privatas che han pers lur dachasa a Bondo. Là vegn infurmà tge donns che vegnan surpigliads.

Las bovas a Bondo han per l'ina chaschunà donns vid bajetgs da persunas privatas sco er vid l'infrastructura chantunala e communala. Quant auta che la summa da donns è na pon ins anc betg dir. Pir cura ch'ils experts pon ir en la zona cotschna san ins dapli da las dimensiuns.

Experts cusseglian la populaziun a Stampa

En il biro da turissem a Stampa vegni a dar in punct d'infurmaziun per la populaziun. Quai ha annunzià il cusseglier guvernativ Christian Rathgeb a l'inscunter mensil da la regenza cun las medias il mardi. Da mesemna enfin dumengia possian persunas privatas sa laschar cussegliar là dals responsabels da l'assicuranza d'edifizis.

Ils bajetgs destruids da persunas privatas pon vegnir bajegiads si danovamain cun la medema valur a Bondo ubain – sch'insatgi na vuless betg turnar – en in auter lieu en il chantun. Sch'insatgi na vul betg bajegiar ina nova chasa vegn el indemnisà cun la valur actuala.

Co ch'ils custs vegnan repartids

Quai che pertutga donns vid l'infrastructura chantunala sco vid rempars ubain vias, paja il chantun cun agid da la Confederaziun. Agid finanzial per Bondo dat quai er da numerusas donaziuns da la chadaina da fortuna.

Abitants èn quietads

Ils abitants da Bondo sa mussan quietads da questas infurmaziuns. Per els saja quai in surlevtg han els ditg la mesemna suenter l'infurmaziun dals responsabels da l'assicuranza.

Intgins dian però era, ch'i dettia chaussas persunalas sco fotografias ni documents persunals ch'ins na possa betg indemnisar cun raps.

RR actualitad 17:00

Artitgels legids il pli savens