Siglir tar il cuntegn

Header

video
Abitants pon turnar durant il di a chasa
Or da Telesguard dals 05.09.2017.
laschar ir. Durada: 37 Secundas.
cuntegn

Valladas talianas Abitants da la zona cotschna pon turnar durant il di a chasa

A partir da gievgia pon las persunas evacuadas a Bondo, Spino e Sottoponte turnar durant il di en lur chasas. Quai ha decidì il stab directiv da la vischnanca da Bregaglia. Plinavant vegn la via chantunala puspè averta la gievgia.

Gia damaun mesemna dastgan las persunas evacuadas da Spino e Sottoponte turnar per l'emprima giada en lur chasas per ir a prender chaussas impurtantas. Damai che quels dus vitgs èn dentant en la zona cotschna, pon las persunas mo turnar en lur chasas cun accumpagnament da forzas d'intervenziun.

A partir da gievgia dastgan ellas lura era turnar en lur chasas, dentant mo durant il di e cun accumpagnament. Pussaivel è quai tranter la bunura las 8.00 e la saira las 20.00 uras.

Access mo cun registraziun

Era abitants da Bondo che vivan ordaifer la zona cotschna na dastgan betg ir en il vitg senza registraziun. Tut tenor periclitaziun è in accumpagnament er anc necessari. Plinavant restan Bondo, Spino e Sottoponte senza forza electrica, aua e rait da telefonia fixa.

La via chantunala vegn averta puspè questa gievgia, dentant mo durant il di da las 06:30 enfin las 20:00. La notg resta la via serrada per motivs da segirtad.

RR novitads 15:00

Artitgels legids il pli savens