Siglir tar il cuntegn
cuntegn

Valladas talianas A San Bernardino èni detg cuntents cun las pendicularas

Las pendicularas da San Bernardino han puspè avert quest enviern, suenter ch’ellas avevan serrà lur territori ils davos quatter onns. Ils implants da sport da San Bernardino èn averts enfin Pasqua, durant emnas pli flaivlas datti mo in manaschi las fins d’emna.

Legenda: Guardar il video San Bernardino cun territori da skis puspè avert. Durada 03:07 minutas.
Or da Telesguard dals 23.01.2017.

Quai duai purtar enavos ils turists al vitg, che patescha gia dapi intgins onns da la mancanza da giasts d’enviern. Per il territori vesi or bain: mintga fin d’emna avra el sias portas e var 300 skiunz e skiunzas vegnan a far lur stortas – per ils trais dals sis runals ch’èn en funcziun tanscha la pauca naiv.

Bain frequentà sur Nadal e Silvester

Sco quai che Franco Ghezzi, commember dal cussegl d’administraziun da la SBIT ha ditg envers RTR, saja ins fitg cuntent cun las frequenzas dals dis da festa. Vi dals implants tecnics n’haja quai enfin oz dà nagins incaps. Ins haja era ils davos quatter onns cura ch’ils implants na cursavan betg adina fatg las revisiuns necessarias.

Sco gia la stad passada, duai la pendiculara era la proxima stad puspè cursar, ed era l’autra stagiun d’enviern duai il territori da skis puspè avrir, uschia Franco Ghezzi. Ils implants da sport da San Bernardino èn averts enfin Pasqua, durant emnas pli flaivlas datti mo in manaschi las fins d’emna.

I dovra anc dapli

Per carmalar fullas da glieud sin il San Bernardino n’è quai però anc betg avunda. Cunzunt ch’il manaschi ha mo lieu la fin d’emna, na gida betg bler als hotels en vischnanca. Quels ston offrir differents events per che la glieud vegn a far vacanzas tar els.

RR actualitad 17:00