Siglir tar il cuntegn
cuntegn

Valladas talianas A Casaccia è staziun finala

La via tranter Casaccia e Vicosoprano è serrada. Ina bova interrumpa la via chantunala che maina en Bregaglia. Fin curt suenter a Casaccia pon ins - suenter è staziun finala e nagut va pli. È a Casaccia fan ins quitads.

Legenda: Guardar il video La Bregaglia è serrada giu dal traffic. Durada 01:51 minutas.
Or da Telesguard dals 01.09.2017.

En l’ustaria da l’Hotel Stampa a Casaccia èsi ruassaivel – memia ruassaivel. Sulet ina dunna da la Germania ha pernottà en l'hotel, ella vuleva ir il venderdi en il decurs dal di fin a Vicosoprano tar ses figl, ch’è là en in champ da musica.

Quai na po ella uss betg far, la via è bloccada da la bova. Uss na sa ella betg propi tge far. Spetgar, ir tar il lieu nua che la via è serrada per survegnir dapli infurmaziuns u forsa tuttina ir a San Murezzan nua ch’i para ad ella pli segir. Ed er l’ustiera Menga Negrini fa quitads. Er la costa sur Casaccia è numnadamain ina zona da privel nua ch’i pudessan vegnir giu bovas. Tuttina emprova ella da consolar la dunna tudestga.

Er l’auto da posta sto spetgar

in auto da posta è parcà a la fermada
Legenda: Er per l'auto da posta na vai betg vinavant. RTR, Prisca Bundi

Betg be per ils autos è Casaccia staziun finala, mabain er per l’auto da posta. Tenor il chauffeur na dettia quai betg bler auter per els da far, che da tegnair èn l’urari e spetgar a Casaccia fin ch’igl è puspè uras dad ir.

Er per in furnitur che stuess purtar medicaments a Vicosoprano na vai betg vinavant. El po laschar ils medicaments en l’hotel. Sch’i vegnissan duvrads exnum pudess ins sgular els a Vicosoprano, manegia el. Plaunet èsi dentant vegnì in zic pli cler a Casaccia, i na daratga betg pli ed i po schizunt dar in zic sulegl uschia ch’ins vesa ils pizs dils culms curclads cun naiv.

RR actualitad 11:00

Via averta a partir da 20:00

Las autoritads fan quint da puspè pudair avrir la via tranter Vicosoprano e Casaccia – e quai il venderdi saira, ca. las 20:00. Quai ha scrit la vischnanca Bregaglia il venderdi suentermezdi en ina communicaziun a las medias.