Siglir tar il cuntegn
cuntegn

Valladas talianas 200 experts unids en ina rait per Bondo

Sut la batgetta da la vischnanca Bregaglia è vegnida etablida ina rait dad experts. Ella duai dumagnar la situaziun da crisa suenter las bovas da Bondo, scriva la vischnanca en ina communicaziun. En il fratemp admoneschan ils meteorologs puspè da plievgiadas la fin d'emna.

Ina rait da passa 200 experts è en acziun per Bondo.
Legenda: Ina rait da passa 200 experts è en acziun per Bondo. Keystone

Ina rait dad experts da passa 200 persunas e passa 20 differents partenari saja londervi da proteger il lieu Bondo, ses conturns e las vias dad ulteriurs donns e da pudair puspè render abitabels ils quartier evacuads da Bondo.

Quai è l’idea principala da la rait per Bondo, scriva la vischnanca da Bregaglia e declera en ina lunga communicaziun a las medias, tge mesiras ch’èn prevesidas e tgi ch’è responsabel per tgeninas incumbensas.

L'acziun stat sut la batgetta da la vischnanca Bregaglia

Il stab directiv da la vischnanca Bregaglia coordinescha e decida tut las mesiras suenter las bovas. El vegn manà da la presidenta communala Anna Giacometti. Il chantun metta a disposiziun divers experts – uschè er il manader da l’acziun. Quai è il manader da l’Uffizi per militar e servetsch civil dal Grischun Martin Bühler.

Batschigl da retegniment è emplenì enfin sisum

Suenter la bova dals 31 d’avust saja tut il batschigl da retegniment puspè emplenì cun crappa, sablun, laina e tocca da las chasas destruidas. Da svidar quel batschigl saja la premissa per pudair en summa puspè ir a viver en las parts na destruidas da Bondo.

Gia curt suenter l’emprima bova èn vegnidas definidas e preparads duas deponias da material da bova en il vest da Bondo. Suenter ch’ellas èn vegnidas cun material pon ellas puspè vegnir duvradas per l’agricultura u per plantar guauds.

Mussavias per terra.
Legenda: I vegn anc a durar onns, fin che la situaziun en la Bregaglia ha puspè sa normalisada. Keystone

Infrastructura dal lieu e da las vias ha da vegnir refatga

L’Uffizi da construcziun bassa dal chantun è responsabel da refar las vias. Il traffic sin la via dal Malögia tras la Bergiaglia e vers l’Engiadina duai pudair circular uschè spert co pussaivel puspè da maniera normala, punctuescha la vischnanca.

Per l’infrastructura èn quai:

  • L’Uffizi da fabrica da Bregaglia reparescha las vias e las lingias dad aua e chanalisaziun.
  • l’Ovra electrica da la citad da Turitg EWZ per segirar e refar il provediment electric.
  • La Swisscom per refar la rait da communicaziun mobila. La rait fixa resta interrutta ad interim.
Val Bondasca da helicopter.
Legenda: En la Val Bondasca smanatschan milliuns da meters cubic material da vegnir giu. Keystone

Anc adina smanatschan 500’000 m2 enfin 1 milliun m2 grippa

Experts da l’Uffizi chantunal per guaud e privels da la natira analiseschan cuntinuadamain ensemen cun l’armada e differents sistems d’alarm la situaziun en muntogna: Anc adina possian sa distatgar mintga mument tranter 500’000 enfin 1 milliun meters cubic grippa da la regiun dal Piz Cengalo.

Sut il piz sajan pliras grondas accumulaziuns da material cun ulteriurs 4 milliuns meters cubic. Ensemen cun l’aua da la Bondasca u glatsch luà dal glatscher pudessia quai dar ulteriuras bovas.

Commembers da l’armada ils dus da settember en acziun a Bondo.
Legenda: Commembers da l’armada ils dus da settember en acziun a Bondo. Keystone

Sustegn per la populaziun da Bondo e conturns saja organisà

En il fratemp hajan ils radund 50 evacuads, ch’avevan chattà in emprim suttetg en il Centro Sanitario Bregaglia, pudì ir en abitaziuns en la regiun. Quellas sajan vegnidas intermediadas per gronda part dad ella, scriva la vischnanca.

Per finir la communicaziun fa valair la vischnanca anc ina giada, ch’ella stettia a disposiziun da mintg’ura a las abitantas ed als abitants da Bondo, Spino e Sottoponte. Er grazia a la Chadaina da Fortuna haja la vischnanca er gia pudì gidar finanzialmain en in u l’auter cas.

Per Bondo en acziun:

tgi
cun quantas persunas
Administraziun communala Bregaglia8
Uffizi da fabrica vischnanca Bregaglia
3
Pumpiers Bregaglia
15
Polizia chantunala dal Grischun
10 - 40
Uffizi per militar e servetsch civil
6
Uffizi per la natira e l'ambient
1
Uffizi da construcziun bassa
10
Uffizi per guaud e privels da la natira
10
Servetsch civil
enfin 40
Assicuranza d'edifizis dal Grischun (cun biro sin il lieu)
5
Armada svizra
50
Salvament alpin svizzer, salvament cun chauns REDOG e REGA
13
Ovras electricas Turitg EWZ
17
Swisscom15
Heli Bernina
4
diversas interpresas da construcziun e transport
25
diversas interpresas spezialas
20

RR novitads 20:00

Puspé plievgiadas fin d'emna

Plievgia.
Legenda: Keystone

Las prognosa prevesan plievgia ferma sonda e dumengia. Quai augmenta puspè il privel da bovas. La vischnanca da Bregaglia scriva, ch'ella vegn a prender mesiras da segirtad per proteger ils avdants da la regiun ed il traffic da transit. Las parts evacuadas da Bondo, Spino e Sottoponte vegnan probabel ad esser accessiblas be fin la sonda a mezdi.