Siglir tar il cuntegn
cuntegn

Grischun Urizis suondan a las chaliras

La notg da sonda sin dumengia han en il Grischun ferms urizis chaschunà donns. A Lumbrein en Lumnezia èn duas stallas brischadas ed a Putz en il Partenz ha in plaun sut d'ina chasa abitada piglià fieu.

  • A Lumbrein en Lumnezia èn duas stallas brischadas giu dal tut suenter ch'il chametg ha dà en.
  • En il Partenz, a Putz, ha il chametg tutgà in mast da telefon ch'è lura crudà sin ina chasa abitada. Il plaun sut il tetg ha piglià fieu. Ils pumpiers han pudì stizzar il fieu, la chasa n'è dentant betg pli abitabla il mument pervi dals donns da fieu e da l'aua.

Quai ha ditg il pledader da la polizia chantunala sin dumonda da RTR.

Blera plievgia e chametgs en il Tessin

Era en il Tessin hai dà suenter las chaliras dumengia en damaun ferms urizzis. Cunzunt pertutgada è stada la regiun da Lugano. Là ai era dà granella.

Las staziuns hajan mesirà enormas quantitads da plievgia. Quai communitgescha SRF Meteo. Fin las 7 la damaun hai dà tar la staziun da Crana-Torricella 136 millimeters plievgia, a Lugano 108 millimeters ed a Cadenazzo 53 millimeters. Quai è aifer paucas uras la mesadad da la plievgia ch'i dat normal en in entir mais.

Maletg da radar.
Legenda: Maletg da radar da la 4 la damaun: Urizis cun granella en il Tessin. SRF Meteo.

Urizis e chametgs

La ferma plievgia ha procurà per inundaziuns localas ed auas grondas che han lura chaschunà per impediments da traffic. Ils urizis eran accumpagnadas da blers chametgs. Sch’ins ha dumbrà ensemen ils chametgs aifer ils nivels d’urizi sco era ils chametgs cun culps en il terren, lura èn ins vegnì sin 36'000 chametgs. La gronda part dals chametgs èn vegnids registrads en il Tessin ed intgins milli era en il Grischun.

Cahmetg en il Tessin.
Legenda: La pli gronda part dals chametgs èn vegnids registrads en il Tessin (maletg d'archiv). Keystone

RR novitads 10:00