Siglir tar il cuntegn
cuntegn

Grischun Uniun chantunala da musica: novas fatschas e dapli daners

Durant la radunanza da delegads è Simona Casaulta vegnida elegida en la suprastanza. Vinavant è Simon Bühler vegnì en la cumissiun da musica. Plinavant survegn l'uniun da nov 25'000 francs empè da 15'000 ad onn dal chantun.

  • Da nov sustegn il chantun l'uniun chantunala da musica cun 25'000 empè da 15'000 francs ad onn.
  • Il reglament da festa è vegnì adattà al standard federal.
  • Simona Casaulta remplazza Daniela Vincenza en suprastanza

Simona Casaulta surpiglia la plazza da Daniela Vincenz. Ella era fin ussa la cassiera da l'Uniun chantunala da musica. Vinavant ha Jürg Padrutt dà giu ses post en la suprastanza. El resta dentant vinavant schef da la musica da veterans dal Grischun. Era la cumissiun da musica ha in nov commember: il posaunist e dirigent Simon Bühler.

Novas reglas

Durant la radunanza a Claustra la sonda ha la suprastanza era fatg adattaziuns da reglament da festa. Quai en vista a la festa da musica chantunala 2019 ad Arosa. Las adattaziuns n'èn betg grondas. La suprastanza ha adattà il reglament al standard federal.

Quai vul p. ex. dir che la musica da marsch ha da nov num musica da parada. Er la scala da valitaziun è vegnida adattada: da nov na datti betg pli il predicat excellent, tar ina valitaziun sur 90 puncts datti uss il predicat fitg bun.

Nova musica da giuvenils

Dapi schaner è la «Musica Giuvenila La Plaiv Zernez» commember uffizial da l'uniun da musica. Quella musica datti dapi bunamain dus onns. Ella è sut la direcziun da Reto Lehner.

Dapli daners dal chantun

Vinavant ha il cusseglier guvernativ Martin Jäger tegnì in pled. En quel ha el ditg, che l'Uniun chantunala da musica survegn a partir da quest onn dapli sustegn finanzial. Empè da 15'000 francs survegn l'uniun nov 25'000 francs ad onn, uschia Martin Jäger.

RR Novitads 12:00