Siglir tar il cuntegn
Inhalt

Ulteriur Grischun Zizers: Refar ils rempars per proteger autostrada, via e binaris

A Zizers pon ils rempars da torrent en la Chessirüfe vegnir sanads communitgescha la regenza. La Confederaziun ed il chantun sa participeschan a la finanziaziun cun contribuziuns da 195’000 francs e 111’400 francs per la correcziun dals curs d'aua.

In dals rempars.
Legenda: Renovar u reparar – in dals rempars en la Chessirüfe sper Zizers. mad

Perquai che las correcturas da la Chessirüfe vegnan er da bun a la via chantunala H3, sa participeschia il Grischun supplementarmain cun ina contribuziun per la construcziun da vias da 27’850 francs, scriva la regenza vinavant.

La Chessirüfe è in torrent activ che passa tras la part sid da Zizers. Qua passan sper la via chantunala er la via naziunala A13 e las lingias da las Viafiers federalas e da la Viafier retica.

Ils ultims onns hajan urizis locals donnegià tut en tut 17 rempars da quest torrent. Per pudair garantir la segirezza en cas d'aua gronda er en l’avegnir, ston ils donns dals rempars vegnir reparads. Quai capitia per part cun novs mirs directivs per manar l’aua en moda controllada envers ils rempars, per part bastia dentant da refar u reparar ils rempars existents, infurmescha il chantun.

RR novitads 11:00