Siglir tar il cuntegn
cuntegn

Ulteriur Grischun Zezras: 1’200 mailers han arsira da plantas

En ina plantascha da puma a Zezras è rut ora il fieu bacterial u l'arsira da plantas. Sco quai ch'il Plantahof communitgescha èn passa 1'200 mailers pertutgads e mussan ils simtoms da la malsogna contagiusa.

Legenda: Tadlar il audio Las feglias brinas caracterirticas per l'arsira da plantas tar in mailer pertutgà a Zezras.. Durada 02:19 minutas.
02:19 min, Actualitad dals 09.06.2017.

Ils mailers eran vegnids plantads questa primavaira. Il cumenzament da zercladur avevan els mussads simptoms caracteristics da la malatia contagiusa. L’infecziun è probablamain capitada la mitad da matg. Tar las temperaturas autas durant quel temp sajan stads pussibels dis d’infecziun, scriva il Plantahof.

Tut las plantas pertutgadas èn vegnidas runcadas cumplettamain e transportadas tar la Gevag nua ch’ellas èn vegnidas brischadas immediatamain. Uschia vulan las autoritads evitar ch’autras plantas vegnan infectadas.

Sche flurs da bostgs da puma da minz sco mailers, pairers u cudogners vegnan brinas davent dal moni nà pudessian bacterias da l’arsira da plantas esser la culpa, avertesscha il Plantahof vinavant. El renviescha a las persunas da controlla en las vischnancas ch’enconuschan il sintoms e ch’èn dad avertir.

RR novitads 18:00

L’arsira da plantas

L’arsira da plantas
Legenda: Keystone

La malatia da plantas, per tudestg «Feuerbrand», è er enconuschenta sut il nom «fieu bacterial» u «setgira cotschna». Ella vegn causada da bacterias fitg contagiusas e po sa derasar epidemicamain. Perquai han cas da vegnir annunziads. La bostga ha da vegnir dismessa immediatamain dad in’equippa scolada. Per ils umans n’è ella betg privlusa.