Siglir tar il cuntegn

Header

cuntegn

WEF Ostessa per in'emna

Chiara Andreoli è normalmain studenta. Durant il WEF lavura ella però sco ostessa.

La saira è l'Hotel Belvedere il hotspot dal WEF. Or da mintga chantun aud'ins la musica da las differentas partys che han lieu mintga saira en l'hotel. Ed en in da quels chantuns lavura Chiara Andreoli. Ella è ina dunna giuvna da 22 onns da Ladir che studegia etnologia, quest’emna è ella dentant ostessa. Questa saira ha ella la survista, tgi che po entrar a la party dal magazin american Forbes.

audio
Chiara Andreoli davart sia lavur sco ostessa al WEF
ord Actualitad dals 24.01.2018.
laschar ir. Durada: 3 minutas 42 Secundas.

Chiara Andreoli è gia per la segunda giada al WEF. Ina pussibilità sco questa duain ins prender, di la giuvna. I saja interessant dad inscuntrar glieud da tut il mund e Chiara Andreoli di, ch'i fetschia simplamain plaschair d' entrar per in’emna en il mund dal WEF.

Ins senta che Chiara Andreoli fa gugent ses job sco ostessa. Ella lavura cun bler engaschament e bler scharm ed è curtaschaivla era cun clients che n'èn betg envidads ed han ina stgisa marscha.

Promis qua e promis là

A Tavau s'inscuntra prominentas e prominents davos mintga chantunada. Era quai è ina part da la lavur sco ostessa che plascha a la giuvna. Be avant duas minutas saja John Kerry passà sperasvi, quinta Chiara Andreoli cun egls glischants. Dentant era Bill Gates u Will.i.am haja ella gìa vis al WEF.

Igl è bain spezial sch'ina princessa chamina speravi.
Autur: Chiara Andreoli ostessa al WEF

Però quai che tuna suenter famus e glorius na saja gnanca uschè simpel. I saja in'emna che dovria bler'energia.

Quantas uras ch'ella vegn en tut a lavurar, na sa ella betg. I saja different - di per di - e bilantscha possian ins far pir suenter il WEF. Dasper l’universitad saja la lavur sco ostessa però lucrativa. Ils 30 francs l’ura possia la studenta bain duvrar sco reserva, di ella fertant ch'ils emprims giasts van vers chasa.

RR actualitad 17:00

Artitgels legids il pli savens