Siglir tar il cuntegn

Header

Video
Pendiculara da Cuira direct a Brambrüesch – las opiniuns
Or da Telesguard dals 12.04.2019.
abspielen
cuntegn

Votaziun a Cuira Nova pendiculara Brambrüesch chaschuna discussiuns

Las pendicularas han lantschà uffizialmain il cumbat per la nova pendiculara directa che duai manar si Brambrüesch. Quella duai custar radund 24 milliuns francs. Tuts n'èn dentant betg d'accord cun questa varianta – ella saja memia luxuriusa.

Plan da las duas pussaivladads a Brambrüesch.
Legenda: La populaziun decida, sch'els vulan remplazzar la pendiculara veglia (alv) cun ina colliaziun directa (cotschen). RTR

Arguments PER la colliaziun directa

Per Tom Leibundgut, cusseglier da la citad ed en quella funcziun er president da las pendicularas Brambrüesch Chur Dreibündenstein èsi cler, che la varianta ch'è sin maisa e custa passa 24 milliuns francs è la meglra.

  • colliaziun pli sperta en 8 minutas enstagl dad uss en ca. 17 minutas
  • colliaziun directa senza stuair far midada sin il «Känzeli»
  • suenter l'investiziun da passa 24 milliuns, na sto la citad betg pajar dapli che uss a las pendicularas (ca. 1 milliun francs ad onn)

Arguments CUNTER la colliaziun directa

Mario Cortesi, president da fracziun da la PPS en il parlament da Cuira vesa quai auter. El è cunzunt da l'avis ch'ins stuess preschentar al suveran almain ina ulteriura varianta, nua che mo la pendiculara dal «Känzeli» fin Brambrüesch vegn remplazzada.

  • varianta memia luxuriusa e betg necessaria per in «culm da chasa», pussaivel ch'ella vegn anc pli chara che previs (fin 30 milliuns francs pervi dal spazi da plus/minus 25%)
  • fiss stà necessari da preschentar ina varianta pli favuraivla per laschar decider il pievel
  • problems tar il spustament da la staziun a val (eventualmain archeologia)

Ils da Cuira pon uss decider sch'els vulan la varianta cun la colliaziun directa per 24 milliuns francs u sch'els vulan restar tar il status quo. Baud ni tard dovra quai dentant ina schliaziun, perquai che la pendiculara dal «Känzeli» a Brambrüesch ha gia passa 50 onns e po restar en funcziun maximalmain fin il 2026.

Parlament e regenza cun mo ina varianta

Era il parlament da la citad da Cuira ha avant bun in mais decidì da sustegnair il project che custa passa 24 milliuns francs. Quai dentant be stretg e suenter lunga discussiun cun 11 cunter 8 vuschs. Cunzunt davart dals burgais avevi dà opposiziun ed igl era vegnì argumentà ch'ins stuess proponer pliras variantas e laschar la decisiun al suveran.

Entant ha inqual partida gia decidì la parola: Enfin uss recumondan la partida socialdemocratica e la partida burgais-democratica da dir GEA a la nova pendiculara. Las ulteriuras partidas n'han anc betg decidì ina parola.

Davart la nova pendiculara si Brambrüesch decida il suveran da Cuira ils 19 da matg 2019.

RR novitads 12:00