Ulteriur Grischun - Voluntaris en acziun per salvar l'anemona a Dusch
En favur da la biodiversitad han voluntaris ensemen cun la Pro Natura fatg urden sin in prà a Dusch sur Pasqual (Paspels). Chaglias e chaglioms han en favur da spezias indigenas da flora e fauna stuì davent.
Datiers da la chapella St. Maria Magadalena a Dusch sur Pasqual è la fin d'emna vegnì lavurà. Quai en favur da la biodiversitad. Il territori da protecziun Dusch è numnadamain in prà sitg, nua ch'ins vul evitar ch'in guaud crescha. Tut en tut ha la zona da protecziun da la Pro Natura a Dusch ina surfatscha da bunamain 5000 m2.
Uschia han 11 voluntarias e voluntaris sut la batgetta da la Pro Natura stgarpà or chaglias e chaglioms sin il prà sitg per dar spazi a spezias periclitadas, per exempel a l'anemona da muntogna. Quella flura è sin la glista da flurs periclitadas. Tut quai che vegn stgarpà or resta en la zona da protecziun. Ils voluntaris furman cun quest lain rumì mantuns – en emprima lingia per dar refugis, spazis vitals a reptils.
1 / 6
Legenda:
La naiv na disturba betg ils voluntaris. Cunquai ch'il sulegl stgauda fitg è quai betg problem.
RTR, Pietro Jacomet
2 / 6
Legenda:
En emprima lingia vai per la protecziun da l'anemona da la muntogna (pulsatilla montana).
RTR, Pietro Jacomet
3 / 6
Legenda:
Tut en tut èn 11 voluntaris stà a Dusch per «schubregiar» il prà magher.
RTR, Pietro Jacomet
4 / 6
Legenda:
Quai che vegn stgarpà or vegn mess ensemen tar mantuns. Uschia creeschan ils voluntaris spazis vitals per animals pitschens.
RTR, Pietro Jacomet
5 / 6
Legenda:
Giusep Blumenthal da Domat era pli baud alpinist – ed anc oz è la natira in da sias grondas passiuns.
RTR, Pietro Jacomet
6 / 6
Legenda:
La spunda sur Dusch, nua che 11 voluntarias e voluntaris han la sonda passada lavurà en favur da la biodiversitad.
RTR, Pietro Jacomet
