Pervia da las temperaturas pli chaudas chatschan intginas sortas schon fitg baud. Sche las temperaturas sur notg crodan – sco quest onn, durant l'avrigl sut nulla – schelan ils chatschs.
Per proteger las vignas datti intginas metodas. Ina nova, ch'il viticultur vul empruvar, è in filfier che stgauda. Quel vegn installà en las vignas e pudess a moda simpla e nuncumplitgada stgaudar l'aria, ed uschè er las ivas. Per las sis hectaras da Roman Hermann custa il filfier var 100'000 francs. Ina investiziun ch'el sto per il mument purtar ses, senza sustegn dal chantun u Confederaziun.
Il sistem saja uss madir
Inventà il filfier chaud ha Sandro Merkle, viticultur en la regiun da Stuttgart. Er el vuleva proteger sias vignas dal fraid. Ensemen cun ses bab ed in electricist saja el lura sesì ensemen ed els hajan entaifer paucs dis sviluppà il filfier. Quai è stà avant quatter onns.
En il fratemp hajan els meglierà il sistem. Passa 100 filfiers haja Sandro Merkle uss schon vendì en Germania ed en Frantscha. En Svizra tutga Roman Hermann tar in dals paucs che nizzegia il filfier.
Il cumissari da vignas dal Plantahof, Walter Fromm, metta grondas speranzas en la tecnologia. El haja schon avant intgins onns udì da questa tecnica, dentant pir ussa saja il sistem propi madir.
Ord l'archiv
Cun il filfier na duvrassi betg pli chandailas per stgaudar las vignas. Ils maletgs da las chandailas èn dentant in toc pli spectaculars ch'in filfier chaud.
