En implants da tir dal Grischun duai a partir dal 2021 be pli esser pussaivel da sajettar sin sistems da tschiffaballas artifizials. Senza tals indrizs na datti nagins daners da la Confederaziun per la sanaziun dal terren contaminà.
Per pudair garantir era en avegnir il sport da tir regiunal, s'uneschan set uniuns da tir dal Partenz per realisar in implant communabel che correspunda a la nova lescha:
Mia finamira è da furmar ina suletta uniun ferma per pudair promover il sport da tir en la regiun er tar ils giuvens.
La primavaira è Walter Hartmann da Jenaz vegnì elegì sco manader da la gruppa da lavur per la realisaziun dal nov stan da tir regiunal. Part dal project fan las uniuns da tir da Jenaz, Luzein, Küblis, Fideris, Conters e Claustra-Serneus.
Ins haja examinà ils implants existents dals auters vitgs. La gruppa da lavur è dentant sa cunvegnida da realisar il nov implant da tir a Küblis. Ins quinta cun custs da var 750'000 francs. Il proxim pass da la gruppa da lavur è da preschentar il project als presidents communals da las set vischnancas. Sch'il project vegn approvà quintan ins da pudair cumenzar las lavurs l’atun 2020.
RR actualitad 17:00