Siglir tar il cuntegn
Inhalt

Ulteriur Grischun Tut en tut ina buna fiera da bambin

Suenter bunamain quatter emnas va la fiera da bambin a Cuira a fin. Malgrà intginas sfidas èn ils organisaturs, tut en tut, cuntents cun la fiera 2017.

La fiera da bambin amez la citad da Cuira.
Legenda: Durant bun quatter emnas ha la fiera da bambin gì lieu a Cuira. RTR, GIAN CARLO CANDINAS

Els hajan cumenzà ils 30 da november la fiera da bambin cun bellezza aura. Ed uss va la fiera a fin cun in di plain sulegl. Tranter en haja l’aura cun ferm vent e cufla dentant fatg in zic in stritg atras il quint dad intgins expositurs. Uschia resumescha Marco Kohler, manader da la fiera da bambin a Cuira, las bun quatter emnas.

Spezialmain pervia da l’aura hajan intgins expositurs gì dis plitost mediochers. Ils davos dis sajan dentant stads fitg bels e han carmalà blera glieud a la fiera. Sco Marco Kohler ha ditg ad RTR, èsi gia uss cler ch’i dat era l’auter onn ina fiera da bambin a Cuira.

RR actualitad 17:00