Siglir tar il cuntegn

Ulteriur Grischun Tut auter ch'in simpel onn per ils viticulturs

Schelira, plievgia permanenta e perfin granella. L’onn 2016 n'è definitiv betg in simpel onn per ils viticulturs en il Grischun.

Vigna en il Signuradi.
Legenda: La vigna en il Signuradi ha da patir pulit quest onn. RTR

Guardà sin l’aura hajan ils viticulturs gì quest onn tut il discletg, di Hans Jüstrich responsabel per vin e vignas al Plantahof.

Quest onn avain nus survegnì in pulit pachet da schletta aura.
Autur: Hans Jüstrichresponsabel per vin e vignas al Plantahof

La schelira, la blera plievgia ed era la granella hajan procurà per donns en las vignas. Tge ch’è stà il pli donnegius per las vignas na sappian ins dentant betg dir.

Sanester in chatsch da la vigna ch'è schelà, dretg in chatsch frestg e saun.
Legenda: L'avrigl ha la vigna patì pervia da la schelira. Sanester in chatsch da la vigna ch'è schelà, dretg in chatsch frestg e saun. RTR

Viticultus n'han betg mo da cumbatter encunter l’aura

Betg mo l’aura procura per chaus cotschens tar ils viticulturs. Encunter bulieus sco la sfarinussa (Mehltau) hani era da cumbatter. E probabel vegn era anc in insect cun il num drosofila dal tscharescher (Kirschessigfliege) a procurar per donns vid la vigna.

Hans Jüstrich quinta en il Signuradi cun 10-15% pli pauca racolta, cumpareglià cun la media dals davos onns. Mirà sin las circumstanzas vegnian ils viticulturs dentant anc davent cun dus egls blaus, manegia el.

Sperar sin in atun dad aur

Sco tut ils viticulturs, spera era Hans Jüstrich uss sin in atun cun bler sulegl e pauca plievgia. Quel savessi anc liberar fitg bler.

RR actualitad 11:00