Adina dapli glieud prenda lecziuns fitness individualas. La cussegliaziun in tar in vegn cunquai er en il sport per ina e scadin adina pli fitg en il center. Quai senta er la fatschenta spezialisada sin trenaments individuals 80'20 ch'ha adina dapli clientella. In da quels clients è Armin Spescha che RTR ha pudì accumpagnar durant ina lecziun.
Il termin fix sco motivaziun
Il termin stat gia daditg en l'agenda. La gievgia sur mezdi ha Armin Spescha in trenament individual. I pluschigna levet ed in ferm vent buffa enturn las ureglias. Cunquai ch'il coach Curdin Bundi spetga gia a l'ur da la citad veglia, na datti oz naginas stgisas da forsa spustar il far sport.
Igl è forsa schon trist. Ma jau dovr quai ch'jau hai fatg giu, ch'insatgi spetga sin mai, ch'jau sai ch'jeu stos ir.
Entant prenda Armin Spescha gia dapi bunamain trais onns lecziuns individualas. Cunzunt l'entschatta haja el sentì il squitsch da «stuair ir». Uss saja quai sa mida. El sentia ina furma da plaschair e vegnia fitg gugent. Da far ils exercizis senza l'egliada critica dal coach, n'è il mument nagina opziun. Cunquai ch'el veglia er far in tschert svilup, schazegia el l'accumpagnament individual, ha el declerà.
Curreger, motivar, cussegliar
«Ir pli fitg en la schanuglia. Stender la bratscha. U duvrar la musculatura dal bist.» Tgi che prenda lecziuns individualas auda durant in'ura numerusas da talas explicaziuns e correcturas. Ed uschia stettia adina la qualitad dal trenament en il center. Gist quai schazegia la clientella da 80'20 sco la co-manadra da fatschenta, Ornella Poltera ha declerà.
