Siglir tar il cuntegn
Inhalt

Ulteriur Grischun Trais unfrendas da lavinas en Svizra – ina en il Grischun

En ina lavina sur Jenaz han ins chattà il corp mort d'in skiunz da turas. Quel valeva dapi sonda saira sco sparì. Tenor la polizia chantunala er'el en ina lavina en ina profunditad da bunamain trais meters.

Culm da Jenaz.
Legenda: Il skiunz da turas valeva dapi sonda saira sco sparì. MAD
  • En il Partenz è in Franzos da 31 onns sa disgrazià sonda en ina lavina. Ses corp han ins chattà dumengia avantmezdi.
  • Sur la Belalp en il chantun Vallais è in um da 39 onns morts tar ina distatga da la lavina.
  • Ed era la viandanta da 29 onns ch'era vegnida la sonda en la Val d'Anniviers en ina lavina è entant morta.
  • Il privel da lavinas è il mument moderà en las Alps svizras.

L'um da 31 onns haja fatg cun sia partenaria ina tura da skis da Fideris a Glattwang. Sut il piz saja il pèr sa separà e l'um haja vulì ir persul sin il piz. Tochen saja la dunna ida persula en ina chamona.

Cura che l'um na saja betg arrivà en la chamona, hajan ins cumenzà in'acziun da tschertga. Pir la dumengia marvegl hajan ins chattà il corp da l'um mort. Tenor emprimas enconuschientschas da la polizia haja l'um mess en moviment ina ruttiva. Quella haja tratg l'um passa in kilometer sur terren grippus.

Unfrendas da lavinas en il Vallais

En il Vallais è in skiunz da turas mort il glindesdi en damaun en ina lavina. L'incident è capità sur la Belalp el chantun Vallais. Malgrà ch'ils cumpogns han chattà l'um da 39 onns, hajan las forzas da salvament mo pli pudì constatar la mort dal skiunz. Quai ha communitgà la Polizia chantunala vallesana.

Ed era la viandanta ch'era vegnida la sonda en la Val d'Anniviers en ina lavina è entant morta. Là eran trais persunas crudadas en ina lavina. Ina persuna aveva pudì sa deliberar sezza. Las ulteriuras persunas avevan ins chattà grazia a apparat da tschertgar disgraziads en lavinas. La giuvna da 29 onns dal chantun Vad n'ha dentant betg pudì sa revegnir da sias blessuras.

RR novitads 11:00