Siglir tar il cuntegn
Inhalt

Ulteriur Grischun Tissientada da monoxid carbonic pervia da l'aura

A Sarn en Tumleastga han nov dunnas endirà ina tissientada da monoxid carbonic. Duas dad ellas èn stadas per in curt mument senza schientscha. Il motiv saja probablamain ch'il chamin funcziunava betg correct pervia da l'aura.

Pasterneria a Sarn.
Legenda: Pervia dal vent ha il monoxid carbonic pudì entrar en la pasternaria. MAD

Il glindesdi saira eran las nov dunnas s'inscuntradas en la pasternaria da vischnanca a Sarn en la Tumleastga. Ellas han fatg pizza en la pigna da lain ed han silsuenter mangià quella en il local rustical. Suenter la tschaina èsi vegnì schlet a pliras dunnas e duas dad ellas han perfin pers la schientscha. Sin quai han ellas avert la fanestra ed alarmà il salvament.

L'aura saja la culpa

En tut han 12 sanitaris salvà las dunnas e purtà ellas en l'ospital da Tusaun per ina controlla. Las pliras han entant pudì bandunar l'ospital ed emprimas enconuschientschas demussan che las dunnas n'han betg da quintar cun donns durabels.

Tenor la polizia chantunala è la raschun per la tissientada da monoxid carbonic ch'il chamin na funcziunava betg pli correct pervia da l'aura cun ferm vent. Uschia è il monoxid carbonic entrà en la pasternaria.

RR novitads 11:30