Il landamma da Tavau, Tarzisius Caviezel, vegn a chalar cun la fin da quest onn. Sco quai che la gasetta Südostschweiz scriva, na vegnia el betg pli a candidar per ina proxima perioda a las elecziuns communalas il zercladur.
A la seduta dal parlament communal vegnia Caviezel ad infurmar uffizialmain ch'el sa retiria da la tribuna politica. Caviezel ha 65 onns ed è dapi il 2013 en uffizi. Tgi che daventa successur u successura n'è anc betg enconuschent.
PLD dovra candidat
Betg cler è, sch'i dat ina candidatura liberaldemocratica da la PLD Tavau. Dapi onns è il post dal landamma en lur mauns. Ussa pari che la decisiun da Caviezel haja surprendì la partida, scriva la gasetta. Sco quai ch'il president da la partida locala, Jürg Oberrauch, ha ditg envers la Südostschweiz, s'inscuntria la cumissiun anc quest'emna per chattar in candidat u ina candidata. Vitiers dettia ina seduta extraordinaria da la suprastanza.
«Opziun» per Favre Accola
Ina persuna che examinescha seriusamain ina candidatura è Valérie Favre Accola. La politicra da la PPS è la suletta dunna en la suprastanza (Kleinder Landrat). Ella fiss l'emprima dunna che daventass landamma.
Ord l'archiv:
Durant il WEF è la funcziun dal landamma in'autra, sco quai ch'il Telesguard ha rapportà il schaner 2019. Il landamma è ospitant.
L'onn 2012 è Caviezel vegnì elegì sco emprima giada landamma da Tavau. Il Radio Rumantsch ha er rapportà lura da quai.
RTR novitads 08:00
